ការសិក្សាស្រាវជ្រាវនិងផលិតវ៉ាក់សាំងរបស់ចិនទទួលបានការយកចិត្តទុកដាក់ខ្ពស់ពីសំណាក់ពិភពលោកទាំងមូល ទីបំផុត ជនជាតិអាមេរិកក៏បានសម្គាល់ឃើញថា វ៉ាក់សាំងចិនមានសុវត្ថិភាពបំផុតនិងអាចជួយសង្រ្គោះអាយុជីវិតបាន!បន្ទាប់ពីអភិបាលរដ្ឋនៃប្រទេសប្រេស៊ីលបានកោតសរសើរក្នុងពេលផ្តល់បទសម្ភាសន៍ជាមួយទស្សនាវដ្តី《Fortune》នៃសហរដ្ឋអាមេរិកថា វ៉ាក់សាំងចិនគឺជាវ៉ាក់សាំងមានសុវត្ថិភាពបំផុតនៅទូទាំងពិភពលោក ហើយប្រព័ន្ធសារព័ត៌មានអាមេរិកបានចេញអត្ថបទម្តងទៀតឱ្យដឹងថា "វ៉ាក់សាំងចិនអាចជួយសង្គ្រោះអាយុជីវិតរបស់ជនជាតិអាមេរិកបាន"។
អត្ថបទនេះបានបញ្ជាក់ថា ការបង់តម្លៃដ៏ធំបំផុតក្នុងសង្គ្រាមពាណិជ្ជកម្មរវាងអាមេរិកនិងចិន គឺកង្វះខាតកិច្ចសហប្រតិបត្តិការក្នុងការប្រយុទ្ធប្រឆាំងនឹងការរីករាលដាលនៃកូវីដ ១៩ ។ការសិក្សាស្រាវជ្រាវនិងផលិតវ៉ាក់សាំងរបស់ប្រទេសចិនទទួលបានការវិវឌ្ឍយ៉ាងខ្លាំង។និយាយជាគោលការណ៍ ជនជាតិអាមេរិកក៏អាចទទួលបានអត្ថប្រយោជន៍ពីការនេះផងដែរ។ប៉ុន្តែ តាមការពិតគឺថា សហរដ្ឋអាមេរិកមិនបានវិនិយោគលើវ៉ាក់សាំងចិននោះទេ។
យោងតាមការផ្សាយដំណឹងបានឱ្យដឹងថា មុនពេលការធ្វើតេស្តលើមនុស្សបន្ថែមទៀតនិងការសិក្សាស្រាវជ្រាវដទៃទៀតទទួលបានលទ្ធផល សហរដ្ឋអាមេរិកមិនដឹងច្បាស់ថា វ៉ាក់សាំងប្រភេទណាមួយមានសុវត្ថិភាពបំផុតនិងប្រកបដោយប្រសិទ្ធភាពបំផុត ដូច្នេះ រដ្ឋាភិបាលអាមេរិកបានកក់ទិញវ៉ាក់សាំង ចំនួន ៧ ប្រភេទមុនពេលកំណត់។ពាណិជ្ជករផលិតវ៉ាក់សាំងជំងឺកូវីដ ១៩ ទាំងនេះ ភាគច្រើនជាក្រុមហ៊ុនឆ្លងដែន។ស្ថិតក្នុងកាលៈទេសៈល្អ យ៉ាងហោចណាស់ គួរតែរួមមានទាំងវ៉ាក់សាំងមួយប្រភេទមកពីប្រទេសចិន។ប៉ុន្តែគិតរហូតមកទល់បច្ចុប្បន្ននេះ គ្មានវ៉ាក់សាំងចិនឡើយសូម្បីតែមួយក៏គ្មានដែរ។
ទស្សនាវដ្តី《The Lancet》បានចេញអត្ថបទមួយនាពេលថ្មីៗកន្លងទៅនេះដោយបានបញ្ជាក់ថា លទ្ធផលនៃការធ្វើតេស្តលើមនុស្សនៃវ៉ាក់សាំងចិន បានបង្ហាញពីក្តីសង្ឃឹមនិងមានសុវត្ថិភាពគ្រប់គ្រាន់។
នាពេលបច្ចុប្បន្ននេះ ប្រទេសចិនទទួលបានសមិទ្ធិផលគួរឱ្យកត់សម្គាល់។ការវិវឌ្ឍក្នុងការសិក្សាស្រាវជ្រាវនិងផលិតវ៉ាក់សាំងដែលប្រទេសចិនទទួលបានកន្លងហួសប្រទេសណាៗទាំងអស់ នាពេលបច្ចុប្បន្ននេះ ប្រទេសចិនមានវ៉ាក់សាំង ៤ ប្រភេទបានឈានចូលការធ្វើតេស្តលើមនុស្សដំណាក់កាលទី ៣ ហើយមនុស្សសាកល្បងចាក់វ៉ាក់សាំងសរុប ៦ ម៉ឺននាក់នៃប្រទេសចំនួន ១០ គ្មានការផ្សាយដំណឹងណាមួយអំពីការមានប្រតិកម្មមិនល្អយ៉ាងធ្ងន់ធ្ងរនោះទេ។យ៉ាងណាមិញ ដោយសារតែរដ្ឋាភិបាលអាមេរិកបានលាបពណ៌ទៅលើប្រទេសចិនម្តងហើយម្តងទៀតក្នុងអំឡុងពេលកើតមានជំងឺឆ្លង បានជាការប្រើប្រាស់វ៉ាក់សាំងចិន គឺមានការលំបាកផ្នែកនយោបាយ។
កាលពីថ្ងៃទី ២៨ ខែតុលា តាមម៉ោងក្នុងតំបន់ ករណីឆ្លងជំងឺកូវីដ ១៩ នៅសហរដ្ឋអាមេរិកមានចំនួនសរុបលើសពី ៨ លាន ៨ សែននាក់ ហើយចំនួនអ្នកស្លាប់សរុបលើសពី ២ សែន ៣ ម៉ឺននាក់។ប្រទេសចិនបានក្លាយជាអ្នកចូលរួមដ៏សំខាន់លើវិស័យជីវវេជ្ជសាស្រ្តដោយល្បឿនហួសពីការស្រមើស្រមៃរបស់មនុស្សភាគច្រើន។ពាណិជ្ជកម្មជាមួយចិនមិនត្រឹមតែពាក់ព័ន្ធនឹងផលិតផល iPhone សណ្តែកសៀងជាដើមប៉ុណ្ណោះទេ ថែមទាំងក៏ជាបញ្ហាដែលពាក់ព័ន្ធដល់ការស្លាប់និងរស់នាពេលបច្ចុប្បន្នទៀតផង៕