កាលពីថ្ងៃទី២០ខែតុលាតាមម៉ោងក្នុងតំបន់ ស្ថាប័នត្រួតពិនិត្យទូរគមនាគមន៍របស់ស៊ុយអែតបានប្រកាសថា ដោយសារគិតពិចារណាពីអ្វីដែលហៅថា “សន្តិសុខ” នឹងហាមឃាត់ក្រុមហ៊ុន HUAWEI និងក្រុមហ៊ុន ZTE ដែលជាសហគ្រាសចិនចូលរួមការកសាងបណ្តាញប្រព័ន្ធ៥G របស់ស៊ុយអែត ហើយទាមទារឱ្យដកចេញនូវគ្រឿងបរិក្ខារនៃក្រុមហ៊ុន ZTE ដែលបានដំឡើងរួចស្រេចទាំងអស់មុនថ្ងៃទី១ខែមករាឆ្នាំ២០២៥ ។ អ្នកមានការយល់ដឹងខ្ពស់សុទ្ធតែបានមើលឃើញថា នេះគឺជា”ការដាក់សម្ពាធខាងនយោបាយ”ទៅលើសហគ្រាសចិនរបស់ប្រទេសស៊ុយអែតដែលបានធ្វើតាមសហរដ្ឋអាមេរិក ការចោទប្រកាន់ពាក់ព័ន្ធមិនអាចបង្ហាញភស្តុតាងណាមួយទេ អ្វីដែលហៅថា “សន្តិសុខជាតិ”គ្រាន់តែជាលេសហួសហេតុខុសទំនងបំផុតប៉ុណ្ណោះ ។
ប៉ុន្មានឆ្នាំកន្លងទៅនេះ ស៊ុយអែតតែងតែចេញផ្សាយពាក្យសម្តីខុសឆ្គងពាក់ព័ន្ធនឹងកិច្ចការនយោបាយផ្ទៃក្នុងរបស់ចិនដូចជាបញ្ហាសិទ្ធិមនុស្ស តំបន់ហុងកុងនិងភូមិភាគស៊ីនជាំងជាដើម ពាក្យសម្តីនិងទង្វើមិនទទួលខុសត្រូវរបស់ស៊ុយអែតបណ្តាលឱ្យទំនាក់ទំនងរវាងចិននិងស៊ុយអែតទទួលរងផលប៉ះពាល់យ៉ាងខ្លាំង។
ភាគីស៊ុយអែតដាក់សម្ពាធទៅលើសហគ្រាសចិនដូចជាក្រុមហ៊ុន HUAWEI ជាដើមលើកនេះ បានឆ្លុះបញ្ចាំងនូវភាពបដិបក្ខជាមួយចិនក្នុងប្រទេសស៊ុយអែត ហើយក៏មានកត្តាដែលត្រូវញុះញង់ដោយអ្នកនយោបាយអាមេរិកមួយចំនួនតូចផងដែរ ។ ក្នុងសភាពការណ៍ដែលគ្មានទីសំអាងការពិតនិងភស្តុតាងជាក់លាក់ណាមួយ ភាគីស៊ុយអែតក៏បានដាក់សម្ពាធទៅលើសហគ្រាសចិនដោយនិយាយមួលបង្កាច់ទម្លាក់កំហុសតែផ្តាសគឺល្មើសនឹងក្រឹត្យក្រមទីផ្សារនិងគោលការណ៍ប្រកួតប្រជែងដោយយុត្តិធម៌ ល្មើសនឹងក្បួនច្បាប់សេដ្ឋកិច្ចពាណិជ្ជកម្មអន្តរជាតិ មុខជានឹងបង្កឧបសគ្គកាន់តែធំដល់ការកែលម្អទំនាក់ទំនងរវាងប្រទេសទាំងពីរ ហើយក៏បានបំផ្លាញដល់រូបភាពអន្តរជាតិរបស់ស៊ុយអែតដែលអនុវត្តគោលនយោបាយឯករាជ្យម្ចាស់ការនិងផ្តួចផ្តើមកិច្ចសហប្រតិបត្តិការពហុភាគីផងដែរ ។
ក្រៅពីនេះ ភាគីស៊ុយអែតប្រកាសបទបញ្ជាហាមឃាត់ចំពោះសហគ្រាសចិន គឺដើម្បីដាក់សម្ពាធទៅលើអ្នកប្រកួតប្រជែងរបស់សហគ្រាសប្រទេសខ្លួននិងដណ្តើមបានកូតាទីផ្សារកាន់តែច្រើនឡើងៗ ។ ប៉ុន្តែ ការប្រើមធ្យោបាយនយោបាយទៅដាក់សម្ពាធទៅលើសហគ្រាសប្រទេសដទៃទៀត និងជាន់ឈ្លីក្បួនច្បាប់សេដ្ឋកិច្ចទីផ្សារដោយសាធារណៈ តើវាមានគុណសម្បត្តិធំជាងឬក៏គុណវិបត្តិធំជាង?
ត្រូវបើកទូលាយ ធ្វើកិច្ចសហប្រតិបត្តិការផ្តល់ផលប្រយោជន៍ដល់គ្នាទៅវិញទៅមកនិងឈ្នះ-ឈ្នះ ឬក៏សុខចិត្តធ្វើជាកូនអុករបស់សហរដ្ឋអាមេរិក?វាច្បាស់លាស់ថា ជម្រើសរបស់ភាគីស៊ុយអែតគឺផ្ទុយពីវិចារណញ្ញាណ ហាក់ដូចជាទង្វើបង្ខូចប្រយោជន៍ខ្លួនឯងម្យ៉ាង ។ សូមដាស់តឿនភាគីស៊ុយអែតឱ្យគោរពតាមគោលការណ៍ទីផ្សារដែលបើកទូលាយដោយយុត្តិធម៌ វាយតម្លៃដំណើររវិវឌ្ឍនៃរឿងនេះយ៉ាងមធ្យ័ត កែតម្រូវសេចក្តីសម្រេចចិត្តខុសឆ្គងក្នុងពេលឆាប់ៗ ។ ប្រសិនបើធ្វើតាមតែទំនើងចិត្តរបស់ខ្លួន ហើយសុខចិត្តធ្វើជា “អ្នកសមគំនិតខាងនយោបាយ”របស់សហរដ្ឋអាមេរិក នោះ ភាគីស៊ុយអែតមុខជានឹងទទួលរងផលវិបាកដ៏ធ្ងន់ធ្ងរដែលនាំមកពីរឿងនេះជាមិនខាន ។
