ទាក់ទិននឹងប្រការដែលមកទល់បច្ចុប្បន្ននេះ អ្នកសារព័ត៌មានចិនប្រចាំនៅអាមេរិកមិនបានទទួលការឆ្លើយតបពីអាមេរិកស្តីពីការពន្យារពេលទិដ្ឋាការ លោក Wang Wenbin អ្នកនាំពាក្យក្រសួងការបរទេសចិនបានថ្លែងក្នុងសន្និសីទសារព័ត៌មានជាប្រចាំនៅថ្ងៃទី៤ ខែសីហាថា អាមេរិកគួរតែកែតម្រូវកំហុសរបស់ខ្លួនភ្លាម ដោយបញ្ឈប់ការគាបសង្កត់ខាងនយោបាយទៅលើប្រព័ន្ធសារព័ត៌មាននិងអ្នកសារព័ត៌មានចិនទៀត ។ បើសិនជាអាមេរិកធ្វើតាមតែទំនើងចិត្តរបស់ខ្លួន នោះប្រទេសចិនមុខជានឹងធ្វើការតបតវិញដ៏ចាំបាច់និងសមហេតុផលជាមិនខាន ដើម្បីគាំពារយ៉ាងមុតមាំនូវសិទ្ធិនិងផលប្រយោជន៍ស្របច្បាប់របស់ខ្លួន ។
លោក Wang Wenbinបានគូសបញ្ជាក់ថា អាមេរិកតែងអួតអាងថាខ្លួនមានសេរីភាពខាងសារព័ត៌មាន ប៉ុន្តែបែរជាតែងធ្វើការរំខាន និងទប់ស្កាត់យ៉ាងកម្រោលចំពោះ សកម្មភាពយកបទសម្ភាសន៍ជាធម្មតារបស់ប្រព័ន្ធសារព័ត៌មានចិននៅអាមេរិកទៅវិញ ប្រការនេះបានលាតត្រដាងពីមុខមាត់លាក់ពុតដែលហៅថា សេរីភាពសារព័ត៌មានរបស់អាមេរិក ហើយនេះជាស្តង់ដាពីរនិងអនុត្តរភាពនិយមសុទ្ធសាធ ។
ពេលឆ្លើយសំណួរស្តីពីថាតើអ្នកសារព័ត៌មានអាមេរិកប្រចាំនៅហុងកុងនឹងរងផលប៉ះពាល់ឬអត់ លោក Wang Wenbinបានបង្ហាញថា តំបន់រដ្ឋបាលពិសេសហុងកុងជាចំណែកមួយរបស់ប្រទេសចិន ប្រទេសចិនមានប្រតិកម្មដ៏ចាំបាច់និងសមហេតុផលដោយខានមិនបានចំពោះការដែលអាមេរិកគាបសង្កត់ដោយគ្មានហេតុផលទៅលើស្ថាប័នប្រព័ន្ធសារព័ត៌មានចិនប្រចាំនៅអាមេរិក ជាសិទ្ធិអំណាចការទូតរបស់រដ្ឋាភិបាលមជ្ឈិម ៕
