ថ្ងៃទី ១៣ ខែកក្កដា អ្នកនាំពាក្យការិយាល័យទំនាក់ទំនងនៃរដ្ឋាភិបាលមជ្ឈិមចិនប្រចាំនៅតំបន់រដ្ឋបាលពិសេសហុងកុងបានថ្កោលទោសយ៉ាងម៉ឺងម៉ាត់ចំពោះពួកប្រឆាំងដែលមិនអើពើនឹងច្បាប់ពាក់ព័ន្ធនិងការព្រមានរបស់រដ្ឋបាលនៃតំបន់រដ្ឋបាលពិសេសហុងកុង ដោយទទូចរៀបចំធ្វើ “ការបោះឆ្នោតបឋម”ដោយខុសច្បាប់ រដ្ឋាភិបាលមជ្ឈិមចិននឹងគាំទ្រយ៉ាងមុតមាំដល់រដ្ឋបាលនៃតំបន់រដ្ឋបាលពិសេសហុងកុងដើម្បីធ្វើការស៊ើបអង្កេតនិងផ្តន្ទាទោសតាមច្បាប់ ។
អ្នកនាំពាក្យរូបនេះបានបង្ហាញថា ការធានាឱ្យការបោះឆ្នោតក្រុមប្រឹក្សានីតិប្បញ្ញត្តិហុងកុងនីតិកាលទី១៣ ដំណើរការក្នុងបរិយាកាសប្រកបដោយភាពយុតិ្តធម៌ គឺពាក់ព័ន្ធនឹងផលប្រយោជន៍ទូទៅនៃសង្គមហុងកុង ក៏ដូចជាសុខមាលភាពរបស់អ្នកក្រុងហុងកុងទាំងស្រុងផងដែរ ។ ពួកប្រឆាំងនិងអ្នកដឹកនាំមួយចំនួនតូចចង់រៀបចំធ្វើអ្វីដែលហៅថា “ការបោះឆ្នោតបឋម” ដោយទទួលបានការគាំទ្រពីកម្លាំងខាងក្រៅ ប្រការនេះជាការបង្ករឿងយ៉ាងធ្ងន់ធ្ងរចំពោះរបបបោះឆ្នោតដែកកំពុងអនុវត្តក្នុងពេលបច្ចុប្បន្ន ហើយក៏បានបំផ្លាញយ៉ាងធ្ងន់ធ្ងរនូវសិទ្ធិនិងផលប្រយោជន៍ស្របច្បាប់របស់បេក្ខជនផ្សេងទៀតផងដែរ ។
អ្នកនាំពាក្យរូបនេះបានគូសបញ្ជាក់ថា បន្ទាប់ពីច្បាប់សន្តិសុខជាតិនៅហុងកុងចាប់ផ្តើមអនុវត្ត សង្គមហុងកុងបានរៀបចំសណ្តាប់ធ្នាប់ជាថ្មីឡើងវិញ អ្នកក្រុងក៏មានជីវភាពរស់នៅប្រកបដោយភាពសុខសាន្តជាថ្មីឡើងវិញផងដែរ ។ ចាំបាច់ត្រូវដឹងឱ្យច្បាស់ថា អង្គការណាឬបុគ្គលណាក៏ដោយ បើរៀបចំធ្វើការបោះឆ្នោតដោយខុសច្បាប់ នោះពិតជាមិនអាចទទួលបានលទ្ធផលដែលពួកគេចង់បាននោះទេ ៕