ថ្ងៃទី១៣ខែកក្កដា តាមម៉ោងក្នុងតំបន់ ក្រសួងការបរទេសអាមេរិកបានចេញសេចក្តីថ្លែងការណ៍ដែលមិនអើពើនឹងកិច្ចខិតខំប្រឹងប្រែងរបស់ចិននិងប្រទេសអាស៊ានក្នុងការគាំពារសន្តិភាពនិងស្ថិរភាពនៅសមុទ្រចិនខាងត្បូង ដោយធ្វើការមួលបង្កាច់តាមទំនើងចិត្តនូវការពិតនិងភាពសត្យានុម័តពាក់ព័ន្ធនឹងសមុទ្រចិនខាងត្បូងនិងច្បាប់អន្តរជាតិដូចជា«អនុសញ្ញាច្បាប់សមុទ្រនៃអង្គការសហប្រជាជាតិ»ជាដើម មានចេតនាឃោសនាបំប៉ោងស្ថានភាពតានតឹងនៅតំបន់សមុទ្រចិនខាងត្បូង ដើម្បីអុជអាលបំបែកបំបាក់ទំនាក់ទំនងរវាងចិននិងប្រទេសក្នុងតំបន់សមុទ្រចិនខាងត្បូង ក៏ដូចជាចោទប្រកាន់ដោយគ្មានហេតុផលចំពោះប្រទេសចិនផងដែរ។ភាគីចិនប្រឆាំងយ៉ាងដាច់ខាតចំពោះរឿងនេះ។
បច្ចុប្បន្ននេះ ស្ថានការណ៍នៅសមុទ្រចិនខាងត្បូងបានរក្សាសន្តិភាពនិងស្ថិរភាពជាទូទៅ ព្រមទាំងបានវិវឌ្ឍរីកចម្រើនទៅកាន់ទិសដៅល្អប្រសើរជាបន្តបន្ទាប់។ ប្រទេសចិននិងប្រទេសតាមបណ្តោយសមុទ្រចិនខាងត្បូងបានរក្សាកិច្ចសន្ទនានិងការប្រាស្រ័យទាក់ទងគ្នាតាមរយៈយន្តការពិគ្រោះពិភាក្សាពីបញ្ហាតាមសមុទ្រ ហើយបានជំរុញដល់កិច្ចសហប្រតិបត្តិការពាក់ព័ន្ធ។នៅក្រោមក្របខណ្ឌនៃការអនុវត្តដោយគ្រប់ជ្រុងជ្រោយនិងប្រកបដោយប្រសិទ្ធភាពនូវសេចកី្តប្រកាសប្រតិបតិ្តសមុទ្រចិនខាងត្បូង ប្រទេសចិននិងប្រទេសអាស៊ានបានជំរុញយ៉ាងសកម្មនូវកិច្ចពិគ្រោះពិភាក្សាអំពីក្រមប្រតិបតិ្តសមុទ្រចិនខាងត្បូង ព្រមទាំងទទួលបានការវិវឌ្ឍរីកចម្រើនដ៏សំខាន់ផងដែរ។
ភាគីចិនដាស់តឿនភាគីអាមេរិកឱ្យគោរពយ៉ាងប្រាកដប្រជានូវពាក្យសន្យារបស់ខ្លួនស្តីពីការមិនប្រកាន់គោលជំហរក្នុងបញ្ហាអធិបតេយ្យភាពទឹកដីនៃសមុទ្រចិនខាងត្បូង គោរពកិច្ចខិតខំប្រឹងប្រែងរបស់ប្រទេសក្នុងតំបន់ក្នុងការគាំពារសន្តិភាពនិងស្ថិរភាពនៅតំបន់សមុទ្រចិនខាងត្បូង កុំធ្វើជាជនរំខាននិងជនបំផ្លាញសន្តិភាពនិងស្ថិរភាពក្នុងតំបន់ទៀត៕