កាលពីថ្ងៃទី១២ ខែកក្កដា លោកស៊ីជីនភីង អគ្គលេខាធិការនៃគណៈកម្មាធិការមជ្ឈិមបក្សកុម្មុយនិស្ត ប្រធានរដ្ឋនិងជាប្រធានគណកម្មាធិការយោធាមជ្ឈិមចិនបានផ្តល់អនុសាសន៍សំខាន់ចំពោះការអនុវត្តការងារបង្ការទឹកជំនន់និងជួយសង្គ្រោះគ្រោះមហន្តរាយឱ្យបានល្អថែមទៀត ។
លោកស៊ីជីនភីងបានថ្លែងថា ពេលកន្លងទៅថ្មីៗនេះ ទន្លេយ៉ង់សេ ទន្លេហ្វាយហឺ បឹងតុងធីង បឹងផូយ៉ាងនិងបឹងថៃហ៊ូជាដើមសុទ្ធតែមានកម្ពស់ទឹកឡើងដល់កម្រិតប្រកាសអាសន្ន ក្រុងChongqing ខេត្ត Jiangxi ខេត្តAnhui ខេត្តHubei ខេត្តHunan ខេត្តJiangsu និងខេត្តZhejiangជាដើមសុទ្ធតែកើតមានគ្រោះទឹកជំនន់ដ៏ធ្ងន់ធ្ងរ បណ្តាលឱ្យមនុស្សស្លាប់រងរបួសនិងខូចខាតទ្រព្យសម្បត្តិ សភាពការណ៍ទប់ទល់គ្រោះមហន្តរាយនាពេលបច្ចុប្បន្នគែតឹងតែងណាស់ ។
លោកស៊ីជីនភីងសង្កត់ធ្ងន់ថា បច្ចុប្បន្នបានឈានចូលរយៈកាលគន្លឹះនៃការបង្ការគ្រោះទឹកជំនន់ គណៈកម្មការបក្សនិងរដ្ឋបាលគ្រប់ជាន់ថ្នាក់ត្រូវទទួលខុសត្រូវ ហ៊ានរ៉ាប់រងភារកិច្ច កម្មាភិបាលគ្រប់ជាន់ថ្នាក់ត្រូវទៅកាន់ជួរមុខ ធ្វើការណែនាំ ចាត់ចែងការជម្លៀសប្រជាជន ចាត់វិធានការកាន់តែមានប្រសិទ្ធភាពនិងខ្លាំងក្លា ធ្វើការងារគ្រប់ផ្នែកឱ្យបានល្អ ដូចជា ការត្រួតពិនិត្យ ផ្តល់សញ្ញាព្រមាន ត្រួតពិនិត្យទំនប់ទឹក ដោះស្រាយហេតុការណ៍បន្ទាន់ ចាត់ចែងប្រជាជនរងគ្រោះជាដើម ខិតខំពេញទំហឹងដើម្បីជួយសង្គ្រោះគ្រោះមហន្តរាយ និងការពារសុវត្ថិភាពអាយុជីវិតនិងទ្រព្យសម្បត្តិរបស់ប្រជាជន ។ បញ្ជាការដ្ឋានគ្រប់គ្រងគ្រោះមហន្តរាយ ក្រសួងគ្រប់គ្រងគ្រោះអាសន្ន ក្រសួងធារាសាស្ត្រជាដើមត្រូវតែបង្កើនការសម្របសម្រួល ចាត់ចែងការងារតាមបែបវិទ្យាសាស្ត្រនូវកម្លាំងនិងសម្ភារៈជួយសង្គ្រោះ ។ កងទ័ពរំដោះប្រជាជននិងកងកម្លាំងប៉ូលីសនៅក្នុងតំបន់ត្រូវសកម្មចូលរួមការងារជួយសង្គ្រោះ ។
លោកស៊ីជីនភីងលើកឡើងទៀតថា ខណៈពេលធ្វើការងារបង្ការគ្រោះទឹកជំនន់និងជួយសង្គ្រោះឱ្យបានល្អ តំបន់នានានិងក្រសួងស្ថាប័នគ្រប់ជាន់ថ្នាក់ត្រូវតែខិតខំរៀបចំការងារស្តារឡើងវិញបន្ទាប់ពីគ្រោះមហន្តរាយ រៀបចំសណ្តាប់ធ្នាប់ផលិតកម្មនិងជីវភាពរស់នៅរបស់ប្រជាជនឡើងវិញឱ្យបានឆាប់ ។ ត្រូវតែធ្វើការងារជួយសង្គ្រោះប្រជាជនរងគ្រោះនិងប្រជាជនជួបការលំបាក បង្ការកុំឱ្យកើតមានភាពក្រីក្រដោយសារគ្រោះមហន្តរាយឬវិលទៅរកភាពក្រីក្រវិញដោយសារគ្រោះមហន្តរាយ ។
គួរឱ្យរំលឹកថា កាលពីខែមិថុនា លោកស៊ីជីនភីងក៏បានផ្តល់អនុសាសន៍សំខាន់ចំពោះការងារជួយសង្គ្រោះគ្រោះមហន្តរាយដែរ ។ លោកបានលើកឡើងថា តំបន់នានានិងក្រសួងស្ថាប័នពាក់ព័ន្ធត្រូវប្រកាន់ខ្ជាប់ការតម្កល់ប្រជាជននិងអាយុជីវិតជាសំខាន់ ៕
