ថ្ងៃទី១២ខែកក្កដា សារព័ត៌មានUSA TODAYរបស់អាមេរិកបានចុះផ្សាយអត្ថបទថា ទាក់ទិននឹងការស្រាវជ្រាវ ផលិតនិងចែកចាយរបស់វ៉ាក់សាំង ប្រទេសមួយចំនួនដូចជាអាមេរិកនិងអង់គ្លេសជាដើមមិនមានផែនការនិងការអនុវត្តយុទ្ធសាស្រ្តជាសកលនោះទេ តែគឺតម្កល់ទុកប្រទេសខ្លួនជាអាទិភាព។ អត្ថបទបានសង្កត់ធ្ងន់ថា ការប្រើ“ជាតិនិយម”លើវិស័យស្រាវជ្រាវនិងផលិតវ៉ាក់សាំងនឹងគំរាមកំហែងដល់កិច្ចខិតខំប្រឹងប្រែងក្នុងការប្រយុទ្ធប្រឆាំងជំងឺឆ្លងលើពិភពលោកទាំងមូល មានតែមនុស្សទាំងអស់សុទ្ធតែមានសុវត្ថិភាពគ្រប់ៗៗ នោះ ទើបជាសុវត្ថិភាពពិតប្រាកដ។
ក្រុមហ៊ុនអឺរ៉ាស៊ីគ្រុបនៃក្រុមហ៊ុនប្រឹក្សាយោបល់ខាងហានិភ័យនយោបាយជាសកលបានចេញរបាយការណ៍ព្យាករណ៍ថា ស្ថានភាពតានតឹងនៃការស្រាវជ្រាវនិងផលិតវ៉ាក់សាំងរវាងប្រទេសនិងប្រទេសនឹងមានភាពកាន់តែខ្លាំងឡើងៗនៅរដូវក្តៅឆ្នាំនេះ សង្រ្គាមដណ្តើមវ៉ាក់សាំងលើកនេះនឹងអូសបន្លាយរហូតដល់ឆ្នាំ២០២១ឬឆ្នាំ២០២២។
កាលពីខែមិថុនា មន្រ្តីជាន់ខ្ពស់អាមេរិកមួយរូបបានថ្លែងថា ភារកិច្ចចម្បងរបស់អាមេរិកគឺធានាឱ្យជនជាតិអាមេរិកដែលត្រូវការវ៉ាក់សាំងអាចចាក់វ៉ាក់សាំងទាំងអស់គ្នា។ក្រុមហ៊ុនផលិតឱសថAstraZenecaដែលមានទីស្នាក់ការទូទៅនៅអង់គ្លេសបានចុះហត្ថលេខាជាមួយសកលវិទ្យាល័យOxfordដែលមានផែនការផលិតវ៉ាក់សាំងជាង១រយលានឈុតនៅមុនដំណាច់ឆ្នាំ២០២០នេះ ព្រមទាំងផ្គត់ផ្គង់ដល់ប្រទេសអង់គ្លេសជាអាទិភាព។
សារព័ត៌មានUSA TODAYបានឱ្យដឹងទៀតថា ដើម្បីឱ្យពលរដ្ឋខ្លួនអាចទទួលបានវ៉ាក់សាំងគ្រប់គ្រាន់ ទង្វើ“ជាតិនិយម”ដែលតម្កល់ទុកខ្លួនជាអាទិភាពបាននិងកំពុងបង្កើនការបដិបក្ខគ្នារវាងប្រទេសនិងប្រទេស តែគឺមិនមែនជំរុញដល់កិច្ចសហប្រតិបត្តិការ កិច្ចសម្របសម្រួលនិងការចែករំលែកយ៉ាងទូលំទូលាយនោះទេ៕
