គិតរហូតដល់បច្ចុប្បន្ននេះ ចំនួនករណីឆ្លងថ្មីជារៀងរាល់ថ្ងៃរបស់សហរដ្ឋអាមេរិកបានបំបែកកំណត់ត្រាជាបន្តបន្ទាប់ ការរីករាលដាលនៃជំងឺកូវីដ១៩ហាក់ដូចជាមិនអាចគ្រប់គ្រងបានទេ ។ ប៉ុន្តែ នាពេលថ្មីៗកន្លងទៅនេះ រដ្ឋាភិបាលអាមេរិកបានធ្វើសេចក្តីសម្រេចតាមទំនើងចិត្តថា តម្រូវឱ្យតំបន់នានារបស់អាមេរិកបើកសាលារៀនជាថ្មីឡើងវិញនៅរដូវរំហើយឆ្នាំនេះ ។ ក្នុងនាមជារដ្ឋមន្ត្រីក្រសួងការអប់រំអាមេរិក លោកស្រី Betsy DeVos ក៏បានប្រកាសថា បើមិនបើកសាលារៀនឡើងវិញ នោះនឹងដកថវិកាដែលដ្ឋាភិបាលទម្លាក់នោះវិញ ។ សេចក្តីសម្រេចនេះធ្វើឱ្យសាលារៀនជាច្រើនពិបាកទទួលយក ទាក់ទិននឹងរឿងនេះ លោក Mike Pence អនុប្រធានាធិបតីអាមេរិកបាននិយាយត្រង់ៗពីមូលហេតុថា ការបើកសាលារៀនឡើងវិញមានសារៈសំខាន់ណាស់ចំពោះសេដ្ឋកិច្ចអាមេរិកដែលបាននិងកំពុងមានភាពថមថយចុះ ទោះបីជានឹងរងផលប៉ះពាល់ពីហានិភ័យសុវត្ថិភាពនិងសុខភាពក៏ដោយ ក៏រដ្ឋាភិបាលនៅមិនស្តាយការបើកសាលារៀនឡើងវិញ ។
ក្រោមបរិបទដែលវិបតិ្តជំងឺកូវីដ១៩មិនមានសភាពល្អឡើងវិញ រដ្ឋាភិបាលអាមេរិកបែរជាជំរុញម្តងហើយម្តងទៀតឱ្យបើកសាលារៀននិងការស្តារផលិតកម្មជាថ្មីឡើងវិញ ។ ដោយមកពីដំណើរស្តារសេដ្ឋកិច្ចឡើងវិញរហ័សពេក តំបន់ជាច្រើននៅមិនទាន់ធ្វើការត្រៀមរៀបចំឱ្យបានល្អ ក៏បានស្តារផលិតកម្មឡើងវិញជាប្រញាប់ ហើយក៏មិនបានអនុវត្តឱ្យបានល្អនូវវិធានការពាក់ព័ន្ធនឹងការងារបង្ការនិងគ្រប់គ្រងនិងដាច់ដោយឡែកពីគ្នា ដូច្នេះ នាពេលថ្មីៗនេះ រដ្ឋមួយចំនួននៅតំបន់ភាគខាងត្បូងនិងខាងលិចអាមេរិកបានរកឃើញករណីឆ្លងថ្មីកាន់តែច្រើនឡើងៗ ។
ប្រព័ន្ធសារព័ត៌មានអាមេរិក ដូចកាសែត New York Times ជាដើមបានសម្គាល់ឃើញថា ការយកឈ្នះលើជងឺកូវីដ១៩ ដែលសេតវិមានបានប្រកាសនោះ គ្រាន់តែជាអ្វីដែលនិយាយបានតែមាត់ឥតប្រយោជន៍ទេ ។ បើសិនជាសភាពការណ៍បង្ការនិងគ្រប់គ្រងជំងឺឆ្លងរបស់អាមេរិកដូចលោកត្រាំ ប្រធានាធិបតីអាមេរិកបាននិយាយដូច្នោះថា ត្រូវបានបន្ធូរបន្ថយរួចហើយ នោះសេដ្ឋកិច្ចអាមេរិកក៏នឹងស្តារឡើងវិញក្នុងទ្រង់ទ្រាយធំផងដែរ ។ ប៉ុន្តែការពិតជាក់ស្តែងគឺ បន្ទាប់ពីអាមេរិកស្តារសេដ្ឋកិច្ចឡើងវិញ ការរីករាលដាលនៃជំងឺឆ្លងក្នុងស្រុកអាមេរិកក៏មិនអាចគ្រប់គ្រងបាន ហើយនេះគ្រាន់តែជាការរាលដាលជុំទីមួយប៉ុណ្ណោះ អ្នកជំនាញអាមេរិកប៉ាន់ប្រមាណថា ការរីករាលដាលនៃជំងឺឆ្លងនៅអាមេរិកនឹងមានភាពធ្ងន់ធ្ងរទៀតនៅរដូវរំហើយឆ្នាំ ២០២០នេះ ។
ស្ថានភាពបច្ចុប្បន្នរបស់អាមេរិក គឺបណ្តាភាគីនានាកំពុងធ្វើការជ្រើសរើសរវាងសុខភាពប្រជាពលរដ្ឋនិងការអភិវឌ្ឍសេដ្ឋកិច្ច អ្នកនយោបាយ ពាណិជ្ជករ អ្នកវិទ្យាសាស្ត្រនិងប្រជាពលរដ្ឋកំពុងស្វែងរកតុល្យភាពរវាងការបង្ការជំងឺឆ្លងនិងការអភិវឌ្ឍ ។ ប៉ុន្តែឋិតក្នុងវិបតិ្តជំងឺឆ្លងបែបនេះ បើអាមេរិកមិនប្រកាន់ឥរិយាបថត្រឹមត្រូវចំពោះការពិតជាក់ស្តែងនៃស្ថានភាពជំងឺឆ្លង និងបំភាន់ប្រជាពលរដ្ឋជាបន្តទៀត នោះវិបតិ្តជំងឺឆ្លងនៅអាមេរិកនឹងមានភាពកាន់តែធ្ងន់ធ្ងរដោយខានមិនបាន ៕
