នាពេលថ្មីៗនេះ អង្គការ UNAIDS សមាគមវេជ្ជសាស្ត្រអ៊ូហ្គង់ដានិងសហព័ន្ធវេជ្ជបណ្ឌិតស៊ូដង់ខាងត្បូងបានរៀបចំឡើងសន្និសីទតាមប្រព័ន្ធវីដេអូមួយដើម្បីអញ្ជើញអ្នកជំនាញវេជ្ជសាស្រ្តចិនឱ្យចូលរួមចែករំលែកនូវបទពិសោធន៍របស់ខ្លួនក្នុងការបង្ការនិងគ្រប់គ្រងការរាតត្បាតនៃជំងឺកូវីដ ១៩ ការធ្វើរោគវិនិច្ឆ័យនិងការព្យាបាលជំងឺឆ្លងជាដើមជាមួយសមភាគីអ៊ូហ្គង់ដានិងស៊ូដង់ខាងត្បូង។
នៅក្នុងសន្និសីទតាមប្រព័ន្ធវីដេអូលើកនេះ លោក Wu Zunyou អ្នកជំនាញផ្នែកជំងឺឆ្លងនៃមជ្ឈមណ្ឌលបង្ការនិងគ្រប់គ្រងជំងឺនៃប្រទេសចិនបានធ្វើបទបង្ហាញពីវិធានការបង្ការខាងសុខាភិបាលសាធារណៈរបស់ប្រទេសចិន ការបង្ការនិងគ្រប់គ្រងជំងឺឆ្លង ការធ្វើរោគវិនិច្ឆ័យនិងបទពិសោធន៍ព្យាបាលជំងឺឆ្លងនៅក្នុងមន្ទីរពេទ្យក្នុងបរិបទផ្ទុះរីករាលដាលនៃជំងឺកូវីដ ១៩ ហើយបានផ្លាស់ប្តូរមតិយោបល់លើការធ្វើតេស្តរកវីរុសនិងការបង្ការនិងព្យាបាលដោយឱសថជាមួយបុគ្គលិកពេទ្យបរទេសតាមអនឡាញ។
ប្រធានសមាគមវេជ្ជសាស្ត្រអ៊ូហ្គង់ដាបានថ្លែងថា ការផ្លាស់ប្តូរនេះមានសារៈសំខាន់យ៉ាងខ្លាំងសម្រាប់ការរៀនសូត្រពីប្រទេសចិនអំពីវិធីសាស្រ្តទប់ទល់នឹងការរីករាលដាលនៃកូវីដ ១៩ ។លោករំពឹងថា អាចចែករំលែកពីបទពិសោធន៍របស់ចិនក្នុងការបង្ការ គ្រប់គ្រងនិងព្យាបាលជំងឺឆ្លងព្រមទាំងវិធានការឆ្លើយតបនិងគ្រប់គ្រងខាងសុខាភិបាលសាធារណៈ។ប្រធានស្តីទីនៃសហព័ន្ធវេជ្ជបណ្ឌិតស៊ូដង់ខាងត្បូងបានលើកឡើងថា ការផ្លាស់ប្តូរតាមប្រព័ន្ធវីដេអូនេះគឺជាឱកាសពិសេសមួយដើម្បីរៀនសូត្រពីអ្នកជំនាញវេជ្ជសាស្រ្តចិន ហើយរំពឹងទុកពីឱកាសបែបនេះទៀតនាពេលអនាគតដើម្បីធ្វើការផ្លាស់ប្តូរបទពិសោធន៍ស្តីពីការប្រយុទ្ធប្រឆាំងនឹងការរាតត្បាតនៃជំងឺឆ្លង៕
