យប់ថ្ងៃទី១៣ខែឧសភា លោក ស៊ី ជីនភីង ប្រធានរដ្ឋចិនបានជួបសន្ទនាតាមទូរស័ព្ទជាមួយលោក Moon Jae-in ប្រធានាធិបតីកូរ៉េខាងត្បូង។
លោក ស៊ី ជីនភីង បានគូសបញ្ជាក់ថា តាមរយៈការខិតខំប្រឹងប្រែងដ៏លំបាក ការរីករាលដាលនៃជំងឺកូវីដ១៩នៅប្រទេសទាំងពីរចិននិងកូរ៉េខាងត្បូងបានត្រូវគ្រប់គ្រងប្រកបដោយប្រសិទ្ធភាព ជាដរាបមកប្រទេសចិននិងកូរ៉េខាងត្បូងបានគាំទ្រនិងជួយគ្នាទៅវិញទៅមកក្នុងការរួមគ្នាទប់ស្កាត់ជំងឺកូវីដ១៩ ប្រទេសចិនរីករាយពង្រឹងកិច្ចសហប្រតិបត្តិការខាងការបង្ការនិងគ្រប់គ្រងការរីករាលដាលនៃជំងឺឆ្លង ការស្រាវជ្រាវនិងអភិវឌ្ឍឱសថនិងវ៉ាក់សាំងជាមួយប្រទេសកូរ៉េខាងត្បូង ក៏ដូចជាគាំទ្រអង្គការសុខភាពពិភពលោកដើរតួនាទីរបស់ខ្លួន បន្តជំរុញកិច្ចសហប្រតិបត្តិការទ្វេភាគីនិងអន្តរជាតិខាងការទប់ស្កាត់ជំងឺឆ្លង។
ជាការឆ្លើយតប លោក Moon Jae-in បានថ្លែងថា ក្រោមការដឹកនាំយ៉ាងមុតមាំរបស់លោកប្រធានរដ្ឋចិន ស៊ី ជីនភីង ប្រទេសចិនទទួលបានសមិទ្ធផលជាក់ស្តែងក្នុងការទប់ស្កាត់ ការរីករាលដាលនៃជំងឺកូវីដ១៩ ខ្ញុំសូមវាយតម្លៃខ្ពស់ចំពោះរឿងនេះ និងសូមជូនពរមហាសន្និបាតនៃសភាទាំងពីររបស់ប្រទេសចិនដែលជិតនឹងបើកធ្វើនាពេលដ៏ខ្លីខាងមុខឱ្យទទួលជោគជ័យដោយគាប់ប្រសើរ កូរ៉េខាងត្បូងរីករាយបន្តធ្វើការប្រាស្រ័យទាក់ទងនិងសហប្រតិបត្តិការជាមួយប្រទែសចិន ដើម្បីដើរតួនាទីដ៏វិជ្ជមានក្នុងការជំរុញឱ្យសហគមន៍អន្តរជាតិបង្កើនសាមគ្គីភាពនិងជំនឿចិត្តចំពោះគ្នា ដើម្បីយកជ័យជម្នះលើជំងឺឆ្លង៕
