បន្ទាប់ពីបានផ្ទុះឡើងនិងរីករាលដាលនៃករណីជំងឺរលាកសួតបង្កដោយវីរុសកូរ៉ូណាថ្មីមក ប្រជាជននៅទូទាំងពិភពលោកបានផ្តល់ការគាំទ្រដល់ប្រទេសចិនតាមគ្រប់ទម្រង់ ។ លោក Moon Jae-in ប្រធានាធិបតីកូរ៉េខាងត្បូងបានលើកឡើងថា កូរ៉េខាងត្បូងនិងចិនជាប្រទេសជិតខាង ជួយអ្នកជិតខាងគឺជួយខ្លួនឯង ។ ក្រៅពីនេះ នៅតាមដងវិថីមួយនៃប្រទេសជប៉ុន ក្មេងស្រីម្នាក់បានបរិច្ចាគម៉ាស់ដល់ក្រុងវូហាន ប្រជាពលរដ្ឋជាច្រើននៃក្រុងហ្សេរុយសាឡិមទៅបួងសួងនៅបូជនីយដ្ឋាន “ជញ្ជាំងយំ” ដើម្បីសុំឱ្យប្រជាជនចិនយកជ័យជម្នះលើការប្រយុទ្ធប្រឆាំងនឹងជំងឺឆ្លង រីឯអ្នកលេងព្យ៉ាណូដ៏ល្បីឈ្មោះនៃប្រទេសបែលហ្ស៊ិក បាននិពន្ធបទចម្រៀងពិសេសមួយបទជូនចំពោះក្រុងវូហានប្រទេសចិន ហើយជឿជាក់ថា ងងឹតពិតជានឹងកន្លងផុតទៅ ក្រុងវូហានពិតជានឹងទទួលបានពន្លឺរស្មីដ៏ត្រចះត្រចង់ក្នុងថ្ងៃថ្មីជាមិនខាន ។
មនុស្សជាតិយើងមានផែនដីតែមួយ បណ្តាប្រទេសនានាបានរួមរស់នៅលើពិភពលោកតែមួយ ។ ប៉ុន្មានឆ្នាំចុងក្រោយនេះ ទស្សនៈស្តីពី “សហគមន៍រួមវាសនាតែមួយរបស់មនុស្សជាតិ”ដែលផ្តួចផ្តើមដោយលោក ស៊ី ជីនភីង ប្រធានរដ្ឋចិន ត្រូវទទួលស្គាល់ពីសំណាក់ប្រទេសកាន់តែច្រើនឡើងៗ ព្រមទាំងបានដាក់បញ្ចូលក្នុងសេចក្តីសម្រេចចិត្តពាក់ព័ន្ធនៃអង្គការសហប្រជាជាតិទៀតផង ។ ខណៈពេលដែលប្រជាជនចិនបាននិងកំពុងធ្វើការតស៊ូប្រយុទ្ធយ៉ាងពេញទំហឹងជាមួយវីរុសកូរ៉ូណាថ្មី សហគមន៍អន្តរជាតិបានផ្តល់ការគាំទ្រនិងជំនួយឧបត្ថម្ភគ្រប់បែបយ៉ាងប្រកបដោយទឹកចិត្តថ្លៃថ្លា ប្រការនេះជាការបង្ហាញយ៉ាងជាក់ស្តែងនិងរស់រវើកនូវស្មារតីស្តីពី “សហគមន៍រួមវាសនាតែមួយរបស់មនុស្សជាតិ” ។
លោកស៊ីជីនភីងបានចង្អុលបង្ហាញថា ប្រទេសចិនបានប្រកាន់ខ្ជាប់ទស្សនៈស្តីពីការបង្កើតសហគមន៍រួមវាសនាតែមួយរបស់មនុស្សជាតិដែលមិនត្រឹមតែទទួលខុសត្រូវចំពោះសុវត្ថិភាពអាយុជីវិតនិងសុខភាពរបស់ប្រជាជននៃប្រទេសខ្លួនប៉ុណ្ណោះទេ ថែមទាំងខិតខំបំពេញករណីយកិច្ចរបស់ខ្លួនដោយអស់ពីលទ្ធភាពដើម្បីបុព្វហេតុសុខាភិបាលសាធារណៈពិភពលោកទាំងមូលទៀតផង។ យើងបានធ្វើកិច្ចខិតខំប្រឹងប្រែងយ៉ាងពេញទំហឹងក្នុងការទប់ស្កាត់ដោយមានប្រសិទ្ធភាពនូវការរីករាលដាលនៃជំងឺឆ្លងក្នុងក្របខ័ណ្ឌពិភពលោកទាំងមូល ។ ភាគីចិននឹងបន្តប្រកាន់អាកប្បកិរិយាបើកចំហនិងប្រកបដោយតម្លាភាព ដើម្បីធ្វើកិច្ចសហប្រតិបត្តិការជាមួយបណ្តាប្រទេសនានាលើពិភពលោក ។ នៅក្រោមការគាំទ្រកម្រិតខ្ពស់និងការផ្តល់ជំនួយឧបត្ថម្ភប្រកបដោយមេត្រីភាព ប្រទេសចិនពិតជានឹងអាចយកឈ្នះលើសង្រ្គាមដ៏វិសាមញ្ញមួយនេះជាមិនខាន។
ប្រឈមមុខនឹងវិបត្តិលើកនេះ សហគមន៍អន្តរជាតិមានតែរួមសុខរួមទុក្ខហើយសាមគ្គីគ្នាជាធ្លុងមួយ ទើបអាចពុះពារការលំបាកបាន។ ពិភពលោកមានភាពល្អប្រសើរ ទើបប្រទេសចិនកាន់តែប្រសើរឡើង ប្រទេសចិនមានភាពល្អប្រសើរ ទើបពិភពលោកកាន់តែប្រសើរឡើង៕
