សំដៅចំពោះសេចក្តីថ្លែងការណ៍ស្តីពីសាលដីកាដែលតុលាការហុងកុងធ្វើការត្រួតពិនិត្យឡើងវិញចំពោះច្បាប់ដែលមានពាក់ព័ន្ធ ដែលគណៈកម្មាធិការកិច្ចការតាក់តែងច្បាប់នៃគណៈកម្មាធិការអចិន្តៃ្រយ៍នៃសភាតំណាងប្រជាជនទូទាំងប្រទេសចិន និងការិយាល័យហុងកុងនិងម៉ាកាវនៃក្រុមប្រឹក្សាកិច្ចការរដ្ឋចិនបានប្រកាសកាលពីថ្ងៃទី ១៩ ខែវិច្ឆិកា ឥស្សរជនមជ្ឈដ្ឋានច្បាប់ហុងកុងបានថ្លែងថា សេចក្តីថ្លែងការណ៍មានពាក់ព័ន្ធទាំងនេះជាការចាំបាច់និងទាន់ពេលវេលា ហើយបានបញ្ជាក់សារជាថ្មីថា គណៈកម្មាធិការអចិន្តៃ្រយ៍នៃសភាតំណាងប្រជាជនទូទាំងប្រទេសចិនមានសិទ្ធិបកស្រាយចុងក្រោយចំពោះច្បាប់មូលដ្ឋាននៃតំបន់រដ្ឋបាលពិសេសហុងកុង។ ឥស្សរជនទាំងនេះសុទ្ធតែបានយល់ឃើញថា សាលក្រមរបស់តុលាការហុងកុងគឺមិនគួរឱ្យជឿ វានឹងជះឥទ្ធិពលអវិជ្ជមានរយៈពេលវែងដល់សង្គមកិច្ចនិងនយោបាយនៃហុងកុង។
លោក Tan Yaozong សមាជិកនៃគណៈកម្មាធិការអចិន្តៃ្រយ៍នៃសភាតំណាងប្រជាជនទូទាំងប្រទេសចិនបានថ្លែងចំពោះការនេះថា សាលក្រមរបស់តុលាការកំពូលហុងកុងបានល្មើសលើការប្តេជ្ញាចិត្តស្តីពីច្បាប់មូលដ្ឋានមានពាក់ព័ន្ធនៃគណៈកម្មាធិការអចិន្តៃ្រយ៍នៃសភាតំណាងប្រជាជនទូទាំងប្រទេសចិន និងបានបំពានជាសាធារណៈចំពោះសិទ្ធិអំណាចនៃគណៈកម្មាធិការអចិន្តៃ្រយ៍នៃសភាតំណាងប្រជាជនទូទាំងប្រទេសចិន។
លោកបានសង្កត់ធ្ងន់ថា រដ្ឋាភិបាលមជ្ឈិមបានលើកឡើងជាច្រើនដងរួចមកហើយថា ស្ថាប័នយុត្តិធម៌ហុងកុងត្រូវគោរពច្បាប់ក្នុងពេលកាត់ទោសនិងដាក់ទណ្ឌកម្មចំពោះឧក្រិដ្ឋជនហិង្សា ហើយការនេះក៏ជាការរំពឹងទុកនៃអ្នកក្រុងហុងកុងជាទូទៅផងដែរ។ ក៏ប៉ុន្តែ ការប្រកាសសាលក្រមរបស់តុលាការកំពូលហុងកុងបាននាំឱ្យ «បទប្បញ្ញត្តិហាមមិនឱ្យបិទបាំងមុខ» ដែលតាក់តែងឡើងដោយឈរលើមូលដ្ឋាននៃ «បទប្បញ្ញត្តិសភាពការណ៍បន្ទាន់» មិនអាចអនវុត្តជាក់ស្តែងបានឡើយ។ នេះស្មើនឹងការបណ្តោយឱ្យឧក្រិដ្ឋជនជ្រុលនិយមដែលពាក់ម៉ាស់បាំងមុខបន្តធ្វើសកម្មភាពខុសច្បាប់ដោយប្រើអំពើហិង្សា បានធ្វើឱ្យពលរដ្ឋហុងកុងទូទៅអស់សង្ឃឹមយ៉ាងខ្លាំង។ លោកយល់ឃើញថា សាលក្រមរបស់តុលាការកំពូលហុងកុងមិនសមរម្យ មានបញ្ហា ត្រូវកែកំហុសភ្លាម៕
