ថ្ងៃទី ៩ ខែវិច្ឆិកា លោក Li Keqiang នាយករដ្ឋមន្ត្រីនៃសាធារណរដ្ឋប្រជាមានិតចិនបានផ្ញើសារលិខិតជូនពរនិងអបអរសាទរយ៉ាងកក់ក្តៅដល់ សម្តេច ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា ក្នុងឱកាសទិវាបុណ្យឯករាជ្យជាតិកម្ពុជាខួបលើកទី ៦៦។
លោក Li Keqiang បានថ្លែងក្នុងលិខិតថា ប៉ុន្មានឆ្នាំកន្លងមកនេះ សង្គមកម្ពុជាមានស្ថិរភាព សេដ្ឋកិច្ចអភិវឌ្ឍន៍ទៅមុខ ជីវភាពរស់នៅរបស់ប្រជាជនបន្តកែលម្អឥតឈប់ឈរ ហើយឋានៈលើឆាកអន្តរជាតិបានកើនឡើងពីមួយថ្ងៃទៅមួយថ្ងៃ។ ក្នុងនាមជាមិត្តល្អនិងមិត្តពិតប្រាកដ ប្រទេសចិនមានទឹកចិត្តសោមនស្សរីករាយយ៉ាងក្រៃលែងចំពោះការនេះ។ ចិននិងកម្ពុជាជាប្រទេសជិតខាងប្រពៃណី កិច្ចសហប្រតិបត្តិការផ្តល់ផលប្រយោជន៍ដល់គ្នាក្នុងគ្រប់វិស័យរវាងប្រទេសទាំងពីរបាននាំមកនូវលទ្ធផលជាក់ស្តែងដល់ប្រជាជនប្រទេសទាំងពីរ។ ខ្ញុំមានឆន្ទៈជំរុញឱ្យទំនាក់ទំនងដៃគូកិច្ចសហប្រតិបត្តិការយុទ្ធសាស្ត្រគ្រប់ជ្រុងជ្រោយរវាងចិននិងកម្ពុជា ឈានលើជំហានថ្មីឥតឈប់ឈរ។
ថ្ងៃដដែល លោក Wang Yi សមាជិកក្រុមប្រឹក្សាកិច្ចការរដ្ឋចិននិងជារដ្ឋមន្ត្រីក្រសួងការបរទេសចិនក៏បានផ្ញើសារលិខិតជូនពរនិងអបអរសាទរដល់លោក ប្រាក់ សុខុន ឧបនាយករដ្ឋមន្ត្រីនិងជារដ្ឋមន្ត្រីក្រសួងការបរទេសនិងសហប្រតិបត្តិការអន្តរជាតិកម្ពុជាផងដែរ។ លោក Wang Yi បានថ្លែងក្នុងសារលិខិតថា ទំនាក់ទំនងចិន-កម្ពុជាបានអភិវឌ្ឍន៍យ៉ាងល្អប្រសើរ ។ ប្រទេសទាំងពីរមានទំនុកចិត្តខាងនយោបាយកម្រិតខ្ពស់ ហើយកិច្ចសហប្រតិបត្តិការទទួលបានលទ្ធផលជាផ្លែផ្កាជាច្រើនអនេកនិងមានការសម្របសម្រួលគ្នាយ៉ាងជិតស្និតក្នុងកិច្ចការពហុភាគី។ ខ្ញុំមានឆន្ទៈបន្តខិតខំប្រឹងប្រែងរួមគ្នាតទៅទៀត ដើម្បីអនុវត្តឱ្យបានល្អនូវមតិឯកភាពដែលមេដឹកនាំប្រទេសទាំងពីរបានដើរដល់ និងជំរុញឱ្យទំនាក់ទំនងដៃគូកិច្ចសហប្រតិបត្តិការយុទ្ធសាស្ត្រគ្រប់ជ្រុងជ្រោយរវាងប្រទេសយើងទាំងពីរកាន់តែស៊ីជម្រៅ៕