នៅរសៀលថ្ងៃទី ១៨ ខែកញ្ញា តាមម៉ោងក្នុងតំបន់ លោកLi Keqiang នាយករដ្ឋមន្រ្តីចិនបានជួបពិភាក្សាការងារជាមួយលោកPutin ប្រធានាធិបតីរុស្ស៊ីនៅវិមានក្រឹមឡាំង ក្រុងម៉ូស្គូ ប្រទេសរុស្ស៊ី ។
ក្នុងកិច្ចជំនួប លោកLi Keqiang បានថ្លែងថា ប្រទេសចិនរីករាយរួមជាមួយរុស្ស៊ីដើម្បីបន្តពង្រឹងនិងពង្រីកចំណងមិត្តភាព ធ្វើឱ្យស៊ីជម្រៅនូវកិច្ចសហប្រតិបត្តិការ បង្កើនការប្រាស្រ័យទាក់ទងគ្នា និងគាំពារប្រព័ន្ធពាណិជ្ជកម្មពហុភាគី ។
លោកLi Keqiang បានថ្លែងទៀតថា ប្រទេសចិនរីករាយជំរុញការតភ្ជាប់គំនិតផ្តួចផ្តើម”ខ្សែក្រវាត់និងផ្លូវ”ជាមួយនិងសហភាពសេដ្ឋកិច្ចអឺរ៉ាស៊ីឱ្យបានកាន់តែល្អ ក៏ដូចជាជំរុញការលើកកម្ពស់ទំហំនិងគុណភាពពាណិជ្ជកម្មរវាងទ្វេភាគីផងដែរ ។ សង្ឃឹមថា ភាគីទាំងពីរអាចប្រកាន់ខ្ជាប់ការពង្រីកការបើកចំហចំពោះគូភាគី បន្ធូរស្តង់ដារដាក់កំហិតចំពោះការបណ្តាក់ទុននិងការអនុញ្ញាតឱ្យចូលទីផ្សារខ្លួន បង្កើតកាលានុវត្តភាពសហប្រតិបត្តិការកាន់តែច្រើនសម្រាប់សហគ្រាសនៃប្រទេសទាំងពីរ សំដៅធ្វើឱ្យកិច្ចសហប្រតិបត្តិការប្រាកដប្រជារវាងចិននិងរុស្ស៊ីទទួលបានផ្លែផ្កាកាន់តែច្រើន ព្រមនិងផ្តល់ផលប្រយោជន៍និងសុភមង្គលកាន់តែច្រើនដល់ប្រជាជននៃប្រទេសទាំងពីរ ។
ជាការឆ្លើយតប លោកPutin បានលើកឡើងថា ភាគីរុស្ស៊ីរីករាយតភ្ជាប់យុទ្ធសាស្រ្តអភិវឌ្ឍន៍របស់ខ្លួនជាមួយនឹងគំនិតផ្តួចផ្តើម”ខ្សែក្រវាត់និងផ្លូវ”ឱ្យកាន់តែល្អ ក្នុងន័យពង្រីកទំហំពាណិជ្ជកម្មទ្វេភាគី ដើម្បីជំរុញការអភិវឌ្ឍជាមួយគ្នា ៕