ថ្ងៃទី ២ ខែសីហា អគ្គស្ថានីយវិទ្យុនិងទូរទស្សន៍មជ្ឈិមចិនបានចេញផ្សាយបទអត្ថាធិប្បាយរបស់អ្នកវិភាគក្រោមចំណងជើងថា «សញ្ញានៃការធ្វើឱ្យស៊ីជម្រៅនូវកំណែទម្រង់ទីផ្សារមូលធនចិនកាន់តែច្បាស់ឡើង» ។
អត្ថបទមួយនេះបានចែងថា ពេលថ្មីៗនេះគណៈកម្មាធិការលំនឹងនិងអភិវឌ្ឍហិរញ្ញវត្ថុនៃក្រុមប្រឹក្សាកិច្ចការរដ្ឋចិនបានសម្រេចថា ត្រូវតែធ្វើឱ្យស៊ីជម្រៅនូវកំណែទម្រង់លើទីផ្សារមូលធនចិនថែមមួយកម្រិតទៀត ដើម្បីប្រែក្លាយជាកម្លាំងចលករសម្រាប់ជំរុញការអភិវឌ្ឍសេដ្ឋកិច្ចប្រកបដោយគុណភាពខ្ពស់យ៉ាងប្រាកដប្រជា ។ នៅមួយសប្តាហ៍មុន គណៈកម្មាធិការឃ្លាំមើលទីផ្សារមូលបត្រចិនបានឱ្យដឹងថា ផែនការមេស្តីពីកំណែទម្រង់ទីផ្សារមូលធនចិនបានចេញជារូបរាងហើយ ។ ហេតុនេះហើយ យើងអាចមើលឃើញថា សញ្ញានៃការធ្វើឱ្យស៊ីជម្រៅនូវកំណែទម្រង់ទីផ្សារមូលធនចិនកាន់តែច្បាស់ឡើង សមត្ថភាពរបស់ទីផ្សារមូលធនសម្រាប់បម្រើដល់ការអភិវឌ្ឍនៃតួអង្គសេដ្ឋកិច្ចពិតត្រូវបានលើកកម្ពស់ថែមទៀត ។
កិច្ចប្រជុំគណៈកម្មាធិការលំនឹងនិងការអភិវឌ្ឍហិរញ្ញវត្ថុនៃក្រុមប្រឹក្សាកិច្ចការរដ្ឋចិនលើកនេះបានលើកឡើងថា ត្រូវចាត់ទុកកំណែទម្រង់មូលបត្រប្រភេទច្នៃប្រឌិតខាងបច្ចេកវិទ្យាជាចំណុចគន្លឹះនៃភាពជោគជ័យ បង្កើនការរចនាពីលំដាប់កំពូលនៃទីផ្សារមូលធនប្រទេសចិន ទន្ទឹមនឹងនេះ ទាក់ទិននឹងបញ្ហាកង្វះខាតផ្នែកមូលធនរយៈពេលវែងនិងអនុបាតស្ថាប័នវិនិយោគិនក្នុងទីផ្សារមូលធនប្រទេសចិន គឺត្រូវកៀរគរវិនិយោគិនពីស្ថាប័ននានា ដើម្បីបង្កើតលក្ខខណ្ឌចូលផ្សារដ៏ល្អប្រសើរសម្រាប់មូលធនរយៈពេលវែង ត្រូវធ្វើឱ្យទីផ្សារមូលធនក្លាយជាកម្លាំងចលករសម្រាប់ជំរុញការអភិវឌ្ឍសេដ្ឋកិច្ចប្រកបដោយគុណភាពខ្ពស់ ។
ស្របនឹងការជំរុញនៃកំណែទម្រង់ជុំថ្មី កម្លាំងរស់វើកនិងភាពធន់នៃទីផ្សារមូលធនចិននិងសមត្ថភាពបម្រើដល់តួអង្គសេដ្ឋកិច្ចពិតនឹងត្រូវលើកកម្ពស់បន្ថែមទៀត ដើម្បីក្លាយជាកម្លាំងដ៏ខ្លាំងក្លាសម្រាប់ជំរុញការអភិវឌ្ឍសេដ្ឋកិច្ចចិនប្រកបដោយគុណភាពខ្ពស់ ។
