តំណាងរដ្ឋាភិបាលនៃប្រទេសអឺរ៉ុប ចំនួន ៤ តំណាងកងកម្លាំងប្រដាប់អាវុធ Houthisនៃប្រទេសយេម៉ែននិងតំណាងរដ្ឋាភិបាលអ៊ីរ៉ង់បានបើកកិច្ចជំនួបលើបញ្ហាយេម៉ែននៅក្រុងតេហេរ៉ង់ ប្រទេសអ៊ីរ៉ង់កាលពីថៃ្ងទី ១៧ ខែសីហា។ព្រមពេលជាមួយគ្នានេះ កងកម្លាំងប្រដាប់អាវុធនៃគណៈកម្មាធិការអន្តរកាលភាគខាងត្បូងបានចាប់ផ្តើមដកចេញពីតំបន់មួយចំនួនដែលបានកាន់កាប់នៅក្រុង Aden ដោយបង្កើតលក្ខខណ្ឌសម្រាប់កិច្ចសន្ទនាជាមួយរដ្ឋាភិបាល។
យោងតាមរបាយការណ៍ឱ្យបានដឹងថា គ្រប់ភាគីទាំងអស់ដែលចូលរួមបានព្រមព្រៀងគ្នាថា សង្គ្រាមនៅយេម៉ែនគួរតែបញ្ឈប់ឱ្យបានឆាប់ ហើយគួរតែដោះស្រាយវិបត្តិនាពេលបច្ចុប្បន្នតាមរយៈមធ្យោបាយនយោបាយ។កិច្ចព្រមព្រៀងរវាងរដ្ឋាភិបាលយេម៉ែននិងកងកម្លាំងប្រដាប់អាវុធ Houthi ដែលបានឈានដល់នៅទីក្រុងស្តុកខុល ប្រទេសស៊ុយអែតកាលពីខែធ្នូ ឆ្នាំ ២០១៨ គួរតែត្រូវបានធានារក្សានិងអនុវត្ត។
នាថ្ងៃដដែល កងកម្លាំងប្រដាប់អាវុធនៃគណៈកម្មាធិការអន្តរកាលភាគខាងត្បូងបានដកចេញពីស្ថាប័នសំខាន់ៗដែលបានកាន់កាប់នៅក្រុង Aden ហើយបានប្រគល់គ្រឿងបរិក្ខារសំខាន់ៗរបស់រដ្ឋាភិបាលឱ្យដល់កងកម្លាំងការពារសន្តិសុខនៃរដ្ឋាភិបាលវិញ៕