លោក Wang Xuefeng បេសកជនពិសេសចិននៃកិច្ចប្រជុំសន្ទនានៃវេទិការវាងចិននិងប្រទេសកោះប៉ាស៊ីហ្វិកបានថែ្លងនៅក្នុងបទសម្ភាសន៍ជាមួយអ្នកសារព័ត៌មានក្នុងអំឡុងពេលអញ្ជើញចូលរួមសកម្មភាពនៃវេទិកាប្រទេសកោះប៉ាស៊ីហ្វិកលើកទី ៣១ នៅប្រទេស ទូវ៉ាលូ កាលពីថៃ្ងទី ១៦ ខែសីហា ថា ទំនាក់ទំនងរវាងចិននិងបណ្តាប្រទេសកោះប៉ាស៊ីហ្វិក គឺ ស្ថិតនៅក្នុងដំណាក់កាលល្អបំផុតក្នុងប្រវត្តិសាស្ត្រ។
លោក Wang Xuefeng បានថែ្លងថា ប្រទេសចិនគាំទ្របណ្តាប្រទេសកោះក្នុងការជ្រើសរើសដើរតាមផ្លូវអភិវឌ្ឍន៍របស់ខ្លួនដែលសមស្របនឹងលក្ខខណ្ឌជាតិរបស់ខ្លួន។ប្រទេសកោះដែលបានបង្កើតចំណងទំនាក់ទំនងការទូតជាមួយប្រទេសចិនបានប្រកាន់ខ្ជាប់យ៉ាងម៉ឺងម៉ាត់នូវគោលការណ៍មានចិនតែមួយនិងបានចូលរួមយ៉ាងសកម្មក្នុងការកសាងគំនិតផ្តួចផ្តើម"ខ្សែក្រវាត់និងផ្លូវ"។
លោក Wang Xuefeng បានចង្អុលបង្ហាញថា ប្រទេសចិននឹងពង្រឹងថែមទៀតនូវកិច្ចសន្ទនានិងកិច្ចសហប្រតិបត្តិការជាមួយបណ្តាប្រទេសកោះលើវិស័យពាក់ព័ន្ធ គាំពារផលប្រយោជន៍រួមរបស់ប្រទេសកំពុងអភិវឌ្ឍន៍និងបញ្ចូលថាមពលវិជ្ជមានទៅក្នុងការកសាងសហគមន៍រួមវាសនានៃមនុស្សជាតិ។ប្រទេសដែលចូលរួមកិច្ចប្រជុំបានសម្តែងការកោតសរសើរយ៉ាងខ្លាំងចំពោះតួនាទីដឹកនាំរបស់ប្រទេសចិនក្នុងកិច្ចសហប្រតិបត្តិការអន្តរជាតិស្តីពីបម្រែបម្រួលអាកាសធាតុ ហើយបានវាយតម្លៃខ្ពស់និងឆ្លើយតបយ៉ាងមុតមាំចំពោះសុន្ទរកថារបស់ប្រទេសចិន៕
