ចាប់តាំងពីជម្លោះសេដ្ឋកិច្ចនិងពាណិជ្ជកម្មរវាងចិននិងអាមេរិកឡើងកម្តៅមក ក្រុមមនុស្សមួយក្តាប់តូចរបស់អាមេរិកក្នុងនោះបូករួមទាំងលោក Rubio សមាជិកព្រឹទ្ធសភានៃបក្សសាធារណរដ្ឋអាមេរិកបានយកជម្លោះនេះជាលេសឃោសនាបំប៉ោងអំពីពាក្យសម្តីដែលថាចិននិងអាមេរិកបានផ្តាច់ទំនាក់ទំនងនឹងគ្នា ដោយអះអាងថានឹងកាត់ផ្តាច់ទំនាក់ទំនងផ្នែកសេដ្ឋកិច្ចនិងពាណិជ្ជកម្ម បច្ចេកវិទ្យានិងវប្បធម៌មនុស្សជាដើមរវាងចិននិងអាមេរិក។ មនុស្សដែលគាំទ្រពាក្យសម្តីបែបនេះបានបំភ្លេចទាំងស្រុងនូវប្រវត្តិសាស្រ្តអភិវឌ្ឍន៍របស់អាមេរិកដែលបុព្វបុរសរបស់ពួកគេបានកសាងអាមេរិកបច្ចុប្បន្នដោយពឹងផ្អែកលើការទៅធ្វើពាណិជ្ជកម្មជាមួយប្រទេសចិននៅឯនាយសមុទ្រ។
នាខែកុម្ភៈឆ្នាំ១៧៨៤ ដើម្បីពុះពារការបំបិទខាងសេដ្ឋកិច្ចពីប្រទេសអង់គ្លេស អាមេរិកបានចាត់បញ្ជូននាវាពាណិជ្ជកម្មមួយគ្រឿងឈ្មោះម្ចាស់ក្សត្រីចិនឱ្យធ្វើដំណើរទៅដល់ក្រុងក្វាំងចូវប្រទេសចិននាខែសីហាឆ្នាំដដែល និងបានចាប់ផ្តើមការធ្វើពាណិជ្ជកម្មដោយផ្ទាល់រវាងប្រទេសទាំងពីរដែលស្ថិតនៅត្រើយទាំងសងខាងនៃមហាសមុទ្រប៉ាស៊ីហ្វិក។ ក្នុងអំឡុងពេលជាង៣ខែដែលចំណតនៅក្រុងក្វាំងចូវ នាវាពាណិជ្ជកម្មឈ្មោះ” ម្ចាស់ក្សត្រីចិន”បានដាក់លក់ផលិតផលដូចជាយិនសិនអាមេរិក ម្រេចនិងសំឡីជាដើម ជាមួយគ្នានេះក៏បានទិញយកផលិតផលចិនដូចជាស្លឹកតែ គ្រឿងពរ្សឺឡែននិងវាយនភ័ណ្ឌជាដើម សរុបបានចំណេញប្រាក់ជាង៣ម៉ឺនដុល្លារអាមេរិក។
ការធ្វើនាវាចរណ៍ដ៏ចម្ងាយឆ្ងាយដែលប្រកបដោយអត្ថន័យប្រវត្តិសាស្ត្រលើកនេះ ធ្វើឱ្យជនជាតិអាមេរិកបានមើលឃើញពីផលកម្រៃយ៉ាងច្រើនសម្បើមដែលបានមកពីទីផ្សាររបស់ប្រទេសចិន ដូច្នេះបាននាំគ្នាធ្វើពាណិជ្ជកម្មផ្ទាល់ជាមួយប្រទេសចិនតាមរយៈផ្លូវសូត្រលើសមុទ្ររបស់អាមេរិកអស់កាលជាយូរ ។ បន្ទាប់ពីទសវត្សរ៍ឆ្នាំ៩០ នៃសតវត្សរ៍ទី១៨ ទំហំពាណិជ្ជកម្មរបស់អាមេរិកជាមួយប្រទេសចិនឈរនៅលំដាប់ទីពីរនៅលើពិភពលោក គឺនៅបន្ទាប់ពីអង់គ្លេស។ បើមើលពីប្រវត្តិសាស្ត្រ អ្នកផងទាំងពួងអាចយល់ឃើញថា កាលពីជាង២រយឆ្នាំមុន អាមេរិកបានជម្នះនូវការបំបិទនូវផ្នែកសេដ្ឋកិច្ចពីសំណាក់អង់គ្លេស តាមរយៈការធ្វើសកម្មភាពពាណិជ្ជកម្មប្រកបដោយសមភាពនិងផ្តល់ផលប្រយោជន៍ទៅវិញទៅមកជាមួយប្រទេសចិន ដែលបានធ្វើឱ្យអាមេរិកដើរតាមផ្លូវអភិវឌ្ឍនិងវិបុលភាព ។ បច្ចុប្បន្ន ប្រទេសចិននិងអាមេរិកបានក្លាយជាដៃគូពាណិជ្ជកម្មធំជាងគេនិងជាគោលដៅបណ្តាក់ទុនសំខាន់ទៅវិញទៅមក នៅឆ្នាំ ២០១៨ ទំហំពាណិជ្ជកម្មទំនិញទ្វេភាគីមានចំនួនដល់ទៅ ៦សែន ៣ ម៉ឺន ៣ពាន់៥រយលានដុល្លារអាមេរិក ប្រាក់ចំណូលបានពីការលក់ដូររបស់សហគ្រាសទុនអាមេរិកដែលធ្វើអាជីវកម្មនៅប្រទេសចិនមានចំនួនលើសពី៧សែនលានដុល្លារអាមេរិក ។ អ្នកផងទាំងពួងប្រហែលពិបាកនឹកស្មានណាស់ថា តើមានកម្លាំងអ្វីដែលអាចកាត់ផ្តាច់ទំនាក់ទំនងផ្តល់ផលប្រយោជន៍ទៅវិញទៅមករវាងចិននិងអាមេរិកនោះ?
ថ្មីៗកន្លងទៅនេះ ក្រុមហ៊ុនអាមេរិកជាង ៦០០ មានដូចជាក្រមហ៊ុន Walmart ជាដើមបានរួមគ្នាផ្ញើលិខិតទៅកាន់រដ្ឋាភិបាលអាមេរិក ដើម្បីសំណូមពរឱ្យរដ្ឋាភិបាលអាមេរិកដោះស្រាយជម្លោះពាណិជ្ជកម្មជាមួយប្រទេសចិន និងបង្ហាញថា ការដំឡើងពន្ធគយបានបង្ករការខូចខាតដល់ផលប្រយោជន៍របស់សហគ្រាសនិងអ្នកប្រើប្រាស់អាមេរិក ។ ក្នុងកិច្ចប្រជុំសវនាការស្តីពីការដំឡើងពន្ធគយលើផលិតផលចិនដែលមានតម្លៃ ៣០ ម៉ឺនលានដុល្លារអាមេរិកដែលប្រព្រឹត្តិទៅនាពេលថ្មីៗនេះ តំណាងសហគ្រាសនិងសមាគមមុខរបរនានារបស់អាមេរិក បូករួមទាំងក្រុមហ៊ុនផលិតសម្លៀកបំពាក់ ក្រុមហ៊ុនផលិតប្រដាប់ប្រដាប្រើប្រាស់របស់កុមារជាដើមសុទ្ធតែប្រឆាំងនឹងការដែលអាមេរិកដំឡើងពន្ធគយចំពោះផលិតផលចិនដោយយល់ឃើញថា សេដ្ឋកិច្ចចិននិងអាមេរិកបានតភ្ជាប់គ្នាយ៉ាងជិតស្និទ្ធ ក្រុមហ៊ុនផលិតកម្មអាមេរិកមិនអាចកាត់ផ្តាច់ពីរោងចក្រចិនដែលមានកម្រិតខ្ពស់និងមានបរិមាណផលិតច្រើនបានទេ ប្រសិនបើបន្តដំឡើនពន្ធគយចំពោះប្រទេសចិនទៀត អ្នកប្រើប្រាស់អាមេរិកនឹងក្លាយជាជនរងគ្រោះខ្លាំងជាងគេ ។
នៅខណៈពេលដែលមានសកលភាវូបនីយកម្មសេដ្ឋកិច្ចកម្រិតខ្ពស់ដូចបច្ចុប្បន្ន ការធ្វើពាណិជ្ជកម្មរវាងចិននិងអាមេរិកគឺពាក់ព័ន្ធដល់ផលប្រយោជន៍របស់ភាគីទាំងពីរ ។ ការបង្ខិតបង្ខំឱ្យចិននិងអាមេរិកផ្តាច់ទំនាក់ទំនងផ្នែកពាណិជ្ជកម្ម ច្បាស់ជានឹងធ្វើឱ្យមានផលប៉ះពាល់ដល់ខ្សែសង្វាក់សេដ្ឋកិច្ចពិភពលោក បំផ្លាញដល់ការបែងចែកតួនាទីឧស្សាហកម្មនៃពិភពលោកទាំងមូល ព្រមទាំងបណ្តាលឱ្យទីផ្សារអន្តរជាតិមានភាពច្របូកច្របល់និងទីផ្សារហិរញ្ញវត្ថុមានរង្គោះរង្គើផងដែរ ។
ពាណិជ្ជកម្មរវាងចិននិងអាមេរិកមានទំហំយ៉ាងធំធេង ការកើតមានជម្លោះគឺជាការធម្មតាណាស់ បញ្ហាជាគន្លឹះគឺភាគីទាំងពីរគួរតែរិះរកវិធីសាស្រ្តដ៏ត្រឹមត្រូវ ដើម្បីគ្រប់គ្រងការខ្វែងគំនិតនិងពង្រឹងនិងពង្រីកគំនិតឯកភាពរួម ។ រំលឹកឡើងវិញពីប្រវត្តិសាស្រ្តកាលពីពេលជាង២៣០ឆ្នាំមុនដែលនាវាពាណិជ្ជកម្មឈ្មោះម្ចាស់ក្សត្រីចិនបានត្រួសត្រាយការធ្វើពាណិជ្ជកម្មរវាងចិននិងអាមេរិក អ្នកផងអាចយល់ដឹងកាន់តែច្បាស់ថា មានតែការប្រកាន់ខ្ជាប់ការគោរពគ្នា សមភាព ការផ្តល់ផលប្រយោជន៍ដល់គ្នាទៅវិញទៅមក និងការដោះស្រាយជម្លោះពាណិជ្ជកម្មប្រកបដោយវិចារណញ្ញាណ ទើបវាសមស្របនឹងផលប្រយោជន៍របស់ភាគីទាំងពីរចិននិងអាមេរិក ។
ប្រវត្តិសាស្រ្តនិងការពិតបានបញ្ជាក់ថា បើចិននិងអាមេរិកធ្វើកិច្ចសហប្រតិបត្តិការជាមួយគ្នា នោះគឺមានអំណោយផលដល់ភាគីទាំងពីរ បើតតាំងគ្នា នោះនឹងប៉ះពាល់ដល់ផលប្រយោជន៍របស់ភាគីទាំងពីរ ។ អាមេរិកមានការចាំបាច់ណាស់ក្នុងការរំលឹកឡើងវិញពីប្រវត្តិសាស្រ្តនៃដើមកំណើតផ្នែកពាណិជ្ជកម្មរបស់ខ្លួន ដើម្បីយល់ដឹងការពិតដែលថា ការផ្តាច់ទំនាក់ទំនងផ្នែកពាណិជ្ជកម្មជាមួយប្រទេសចិនគឺផ្តាច់ទំនាក់ទំនងជាមួយកាលានុវត្តភាព និងផ្តាច់ទំនាក់ទំនងជាមួយអនាគត ពោលគឺផ្តាច់ទំនាក់ទំនងជាមួយពិភពលោកតែម្តង៕