ថ្ងៃទី១៤ខែមិថុនា កិច្ចជំនួបលើកទី៥នៃប្រមុខរដ្ឋចិន រុស្ស៊ីនិងម៉ុងហ្គោលីបានបើកធ្វើក្រោមការចូលរួមពីលោកស៊ីជីនភីងប្រធានរដ្ឋចិន លោកភូទីនប្រធានាធិបតីរុស្ស៊ីនិងលោកKhaltmaa Battulgaប្រធានាធិបតីម៉ុងហ្គោលីនៅក្រុងប៊ីស្កេករដ្ឋធានីកៀហ្ស៊ីស៊ីស្ថាន។
ប្រមុខរដ្ឋនៃប្រទេសទាំង៣បានបូកសរុបសមិទ្ធផលនៃកិច្ចសហប្រតិបត្តិការត្រីភាគី និងពិភាក្សាគ្នាដើម្បីជំរុញកិច្ចសហប្រតិបត្តិការដោយគ្រប់ជ្រុងជ្រោយ។
ថ្លែងក្នុងកិច្ចជំនួប លោកស៊ីជីនភីងបានលើកឡើងថា ឆ្នាំ២០១៩នេះ ប្រទេសចិននឹងធ្វើពិធីអបអរខួបទី៧០នៃការបង្កើតទំនាក់ទំនងផ្លូវទូតដោយឡែកពីគ្នាជាមួយរុស្ស៊ីនិងម៉ុងហ្គោលី។ កិច្ចសហប្រតិបត្តិការត្រីភាគីរវាងចិន រុស្ស៊ីនិងម៉ុងហ្គោលីនឹងទទួលបានកាលានុវត្តភាពថ្មី។ ក្រោមបរិបទបច្ចុប្បន្នដែលការគាំពារនិយមនិងឯកតោភាគីនិយមបានងើបឡើង ភាគីទាំង៣ត្រូវរួមគ្នាជំរុញយ៉ាងមុតមាំនូវកិច្ចសហប្រតិបត្តិការក្នុងតំបន់និងសម្រេចការអភិវឌ្ឍរួម ជំរុញកិច្ចសហប្រតិបត្តិការគ្រប់ជ្រុងជ្រោយលើគ្រប់វិស័យ ក៏ដូចជារួមគ្នាបញ្ចេញសញ្ញាវិជ្ជមានដែលប្រទេសទាំង៣សហការគ្នាគាំពារពហុភាគីនិយមនិងអភិវឌ្ឍសេដ្ឋកិច្ចពិភពលោកបែបបើកទូលាយ។
ដោយឡែកលោកស៊ីជីនភីងក៏បានលើកសំណើ៣ចំណុចដើម្បីជំរុញកិច្ចសហប្រតិបត្តិការត្រីភាគី ទី១ ជំរុញកិច្ចសហប្រតិបត្តិការត្រីភាគីតាមបែបយុទ្ធសាស្រ្ត។ ទី២ ជំរុញកិច្ចសហប្រតិបត្តិការត្រីភាគីតាមរយៈកិច្ចសហប្រតិបត្តិការសំខាន់ៗ។ ទី៣ពង្រឹងនិងពង្រីកការសម្របសម្រួលនិងកិច្ចសហការក្នុងក្របខ័ណ្ឌនៃអង្គការសហប្រតិបត្តិការសៀងហៃ៕