ពេលថ្មីៗកន្លងទៅនេះ ភាគីអាមេរិកបានចាប់ផ្តើមដំឡើងពន្ធគយ២៥ភាគរយចំពោះទំនិញចិននាំចូលទៅសហរដ្ឋអាមេរិកក្នុងតម្លៃ២សែនលានដុល្លារអាមេរិក ។ លោក Wang Zhijun អនុរដ្ឋមន្ត្រីក្រសួងឧស្សាហកម្មនិងព័ត៌មានវិទ្យាចិនបានថ្លែងនៅពេលទទួលសម្ភាសន៍នៅពេលថ្មីៗកន្លងទៅនេះថា ការដំឡើងពន្ធគយរបស់សហរដ្ឋអាមេរិកគឺគ្មានផលប្រយោជន៍ដល់ប្រទេសចិននោះទេ ហើយក៏គ្មានផលប្រយោជន៍ដល់សហរដ្ឋអាមេរិក និងគ្មានផលប្រយោជន៍ដល់ពិភពលោកផងដែរ ។ ពិតមែនតែអាជីវកម្មនិងសហគ្រាសមួយចំនួនរបស់ប្រទេសចិននឹងប្រឈមមុខនឹងសម្ពាធដូចជាថ្លៃដើមកើនឡើងជាដើម ប៉ុន្តែឥទ្ធិពលនេះអាចត្រូវគ្រប់គ្រងបានជាទូទៅ ។
លោក Wang Zhijun អនុរដ្ឋមន្ត្រីក្រសួងឧស្សាហកម្មនិងព័ត៌មានវិទ្យាចិនបាននិយាយថា ការនាំចេញទៅសហរដ្ឋអាមេរិកដែលមានតម្លៃ២សែនលានដុល្លារអាមេរិក គឺស្មើនឹងចំនួន៨ភាគរយនៃការនាំចេញសរុបរបស់ចិនទៅកាន់បរទេសប៉ុណ្ណោះ ។ ក្នុងសហគ្រាសដែលផលិតទំនិញសម្រាប់នាំចេញក្នុងតម្លៃ២សែនលានដុល្លារអាមេរិកនេះ គឺមានសហគ្រាសទុនបរទេសចំនួន៥០ភាគរយ ក្នុងនោះ សហគ្រាសទុនបរទេសជាច្រើនជាសហគ្រាសអាមេរិក ។ ដូច្នេះ សហរដ្ឋអាមេរិកដំឡើងពន្ធគយ មិនត្រឹមតែប៉ះពាល់ដល់សហគ្រាសចិនប៉ុណ្ណោះទេ ថែមទាំងក៏បានប៉ះពាល់ដល់ផលប្រយោជន៍របស់សហគ្រាសអាមេរិកនិងអ្នកប្រើប្រាស់របស់អាមេរិកផងដែរ ។ ព្រមទាំងក៏នឹងគំរាមកំហែងដល់សន្តិសុខនៃខ្សែសង្វាក់ឧស្សាហកម្មអន្តរជាតិទៀតផង ។
លោក Wang Zhijun ក៏បានថ្លែងទៀតថា ប្រទេសចិននឹងបន្តជំរុញនិងលើកកម្ពស់កម្រិតបើកទូលាយចំពោះអន្តរជាតិក្នុងវិស័យឧស្សាហកម្ម ។ ទីមួយ គឺអនុវត្តជាក់ស្តែងនូវគោលនយោបាយបើកទូលាយក្នុងវិស័យយន្តហោះ នាវា រថយន្តនិងទូរគមនាគមន៍ជាដើម ។ ទីពីរ គឺជំរុញការកែបញ្ជីអវិជ្ជមាននៃការអនុញ្ញាតឲ្យពាណិជ្ជករបរទេសចូលទៅតំបន់ពាណិជ្ជកម្មសេរីនិងទូទាំងប្រទេស និងកាត់បន្ថយយ៉ាងខ្លាំងនូវខ្លឹមសារនៃបញ្ជីអវិជ្ជមាន ។