ក្នុងដំណើរការនៃកិច្ចពិគ្រោះពិភាក្សាផែ្នកសេដ្ឋកិច្ចនិងពាណិជ្ជកម្មរវាងចិននិងសហរដ្ឋអាមេរិក ភាគីអាមេរិកបានដាក់សម្ពាធដោយបង្ខំតាមរយៈការគំរាមកំហែងការដំឡើងលើពន្ធគយ ដើម្បីទាមទារអ្វីៗជាច្រើនដែលហួសពីវិសាលភាពនៃពាណិជ្ជកម្ម ព្រមទាំងបានចេញផ្សាយព័ត៌មានមិនពិតទៀតផង។សេដ្ឋវិទូចិនដែលមានកិត្យានុភាពជាច្រើនរូបជឿជាក់ថា នេះគឺជាលេសមួយសម្រាប់អាមេរិកក្នុងការដាក់សម្ពាធជាអតិបរមា ក្នុងគោលបំណងចុងក្រោយ គឺរារាំងការអភិវឌ្ឍរបស់ប្រទេសចិន។ក្រុមអ្នកជំនាញការបានសង្កត់ធ្ងន់ថា បញ្ហាសេដ្ឋកិច្ចនិងពាណិជ្ជកម្មរវាងចិននិងសហរដ្ឋអាមេរិកអាចដោះស្រាយបានតាមរយៈកិច្ចសហប្រតិបត្តិការប្រកបដោយភាពយុត្តិធម៌។
លោកស្រី Dongyan មកពីវិទ្យាស្ថានសិក្សាស្រាវជ្រាវសេដ្ឋកិច្ចនិងនយោបាយពិភពលោកនៃបណ្ឌិត្យសភាសង្គមវិទ្យាចិនជឿជាក់ថា នៅក្នុងដំណើរការនៃកិច្ចចរចាររវាងចិននិងសហរដ្ឋអាមេរិកនាពេលបច្ចុប្បន្ននេះ ការទាមទាររបស់ភាគីអាមេរិកបានលើសពីបញ្ហាពន្ធគយ។នៅក្នុងដំណើរការនេះ រដ្ឋាភិបាលអាមេរិកមិនអើពើចំពោះកិច្ចខិតខំប្រឹងប្រែងរបស់ប្រទេសចិននៅក្នុងច្បាប់វិនិយោគបរទេសនិងការបើកទូលាយជាលក្ខណៈរបបជាដើម។ផ្ទុយទៅវិញ ភាគីអាមេរិកសង្ឃឹមថា ប្រទេសចិននឹងបំពេញតាមការទាមទាររបស់ខ្លួនក្នុងរយៈពេលខ្លីតាមរយៈដាក់សម្ពាធជាអតិបរមា។
លោក Lin Yifu សេដ្ឋវិទូដ៏ល្បីល្បាញនៃប្រទេសចិនបានចង្អុលបង្ហាញថា ការអភិវឌ្ឍសេដ្ឋកិច្ចនៃប្រទេសចិនគឺ មានផលប្រយោជន៍សម្រាប់ពិភពលោកទាំងមូល។កំណែទម្រង់និងការបើកទូលាយរបស់ចិនក៏ជាឱកាសសម្រាប់ការអភិវឌ្ឍនៅក្នុងប្រទេសដទៃទៀតផងដែរ។សហគ្រិននិងប្រជាជនអាមេរិកក៏សង្ឃឹមដែរថា នឹងចែករំលែកនូវឱកាសនៃការអភិវឌ្ឍរបស់ប្រទេសចិន៕
