ពេលថ្មីៗកន្លងទៅនេះ លោក Tom Nichols សាស្ត្រាចារ្យនៃវិទ្យាស្ថានយោធានៃកងទ័ពជើងទឹកសហរដ្ឋអាមេរិកបានចុះផ្សាយអត្ថបទលើកាសែត USA TODAY ដោយធ្វើការវិភាគចំពោះកិច្ចការការទូតរបស់សហរដ្ឋអាមេរិកក្នុងរយៈពេលកន្លងទៅនេះ ដោយមានសេចក្តីសន្និដ្ឋានថា នយោបាយការទូតរបស់សហរដ្ឋអាមេរិកមាននិន្នាការបាត់បង់ការគ្រប់គ្រងហើយ ។
ក្នុងឋានៈជាតំណាងនៃបក្សពួកឥន្ទ្រីរបស់សហរដ្ឋអាមេរិក លោក John Bolton ជំនួយការទទួលបន្ទុកកិច្ចការសន្តិសុខជាតិរបស់ប្រធានាធិបតីធ្លាប់បង្ហាញពីគំនិតរបស់ខ្លួនថា “សហរដ្ឋអាមេរិកនឹងអនុញ្ញាតឲ្យអង្គការសហប្រជាជាតិដើរតួនាទីរបស់ខ្លួននៅពេលត្រូវការជាចាំបាច់ នេះជាអ្វីដែលគួរតែមានចំពោះសហរដ្ឋអាមេរិក បញ្ហាតែមមួយគត់គឺសមស្របនឹងផលប្រយោជន៍ជាតិរបស់យើង ។ ប្រសិនបើអ្នកមិនចូលចិត្ត ខ្ញុំសុំអភ័យទោស ប៉ុន្តែនេះគឺជាការពិត ។”ក្រៅពីនេះ លោកក៏តែងតែបង្ហាញលើប្រព័ន្ធសារព័ត៌មានសំខាន់ៗរបស់សហរដ្ឋអាមេរិកថា ត្រូវវាយប្រហារកូរ៉េខាងជើងនិងអ៊ីរ៉ង់ដោយយោធា ។
បន្ទាប់ពីកាន់តំណែងជាជំនួយការរបស់ប្រធានាធិបតីអាមេរិកទទួលបន្ទុកកិច្ចការសន្តិសុខជាតិ លោកJohn Bolton តែងតែលើកឡើងថា “គ្រាប់មីស៊ីលចិនគំរាមកំហែងដល់ប្រទេសរុស្ស៊ី”ប៉ុន្តែទីបំផុតត្រូវបានភាគីរុស្ស៊ីច្រានចោល ដោយរុស្ស៊ីបានថ្លែងថា គឺអាមេរិកនិងអង្គការណាតូទៅវិញទេដែលបានគំរាមកំហែងដល់ផលប្រយោជន៍របស់រុស្ស៊ី មិនមែនប្រទេសចិននោះទេ ។ នាខែមេសានៅសេតវិមាន លោកJohn Boltonបានប្រាប់អ្នកសារព័ត៌មានទៀតថា កងទ័ពគុយបាបានជួយលោកប្រធានាធិបតីវ៉េណេស៊ុយអេឡារក្សាអំណាចនៅក្នុងប្រទេសវ៉េណាស៊ុយអេឡា ជាលទ្ធផលត្រូវបានរដ្ឋមន្ត្រីការបរទេសគុយបាស្តីបន្ទោសនិងខឹងសម្បាយ៉ាងខ្លាំងលើTwitterថា លោកJohn Boltonជាអ្នកនិយាយកុហកម្នាក់ ដោយផ្តល់ព័ត៌មានខុសឆ្គងដល់លោកត្រាំ ។
ជាការពិត មិនត្រឹមតែមានលោកJohn Boltonដែលរៀបចំគោលនយោបាយទូតនៃសេតវិមាននោះទេ ក៏នៅមានលោកMike PompeoនិងលោកPeter Navarro ជាដើមដែលជាបក្សពួកឥន្ទ្រីដ៏រឹងមាំ ។ ពួកគេចង់ឲ្យអាមេរិកបន្តមានអនុត្តរភាពលើពិភពលោកដូច្នេះហ៊ានបង្កើនវិវាទនិងនិយាយមួលបង្កាច់ ។ ប៉ុន្តែពិភពលោកបច្ចុប្បន្នកំពុងតែមានការផ្លាស់ប្តូរយ៉ាងខ្លាំង ហើយភាពក្រអឺតក្រទមបែបនេះមិនអាចផ្លាស់ប្តូរនិន្នាការនៃការអភិវឌ្ឍនៃយុគសម័យបាននោះទេ ។
ស្ថិតក្រោមការរីកចម្រើននៃសកលភាវូបនីយកម្មផែ្នកសេដ្ឋកិច្ច ពហុប៉ូលភាវូបនីយកម្មផែ្នកនយោបាយនិងព័ត៌មានភាវូបនីយកម្មផែ្នកសង្គម រចនាសម្ព័ន្ធអំណាចអន្ដរជាតិនិងសណ្ដាប់ធ្នាប់សកលបានទទួលការកែតម្រូវជាច្រើនក្នុងរយៈពេល ៣០ កន្លងទៅនេះ។ការរីកចម្រើននៃបណ្តាប្រទេសកំពុងអភិវឌ្ឍន៍ ជាពិសេសបណ្តាប្រទេសដែលមានទីផ្សារងើបឡើងថ្មីបានក្លាយជាកម្លាំងចលករសំខាន់នៃកំណើនសេដ្ឋកិច្ចពិភពលោក។របាយការណ៍ស្តីពី<ការផ្លាស់ប្តូរនៃស្ថានភាពសេដ្ឋកិច្ចអន្តរជាតិនិងជម្រើសយុទ្ធសាស្ត្ររបស់ចិននាពេលអនាគត>ដែលបានចេញផ្សាយដោយប្រទេសចិនកាលពីខែធ្នូ ឆ្នាំមុន បានព្យាករណ៍ថា ផលិតផលក្នុងស្រុកសរុបរបស់បណ្តាប្រទេសកំពុងអភិវឌ្ឍន៍នឹងកើនឡើងលើសពីប្រទេសតួអង្គសេដ្ឋកិច្ចដែលរីកចម្រើននៅឆ្នាំ ២០៣៥ ហើយសមាមាត្រនៃសេដ្ឋកិច្ចពិភពលោកនិងការវិនិយោគនឹងមានជិត ៦០ ភាគរយ។
តាមការពិតនៅក្នុងពិភពលោកនាពេលបច្ចុប្បន្ននេះ គឺថា សម័យកាលនៃកម្លាំងជាតិដ៏ទូលំទូលាយរបស់អាមេរិកដែលបានធ្វើជាអធិរាជនៅលើពិភពលោកបានកន្លងផុតទៅហើយ។អស់លោកទាំងឡាយដូចជាលោក John Bolton ដែលបានតែងតែស្រែកហៅចង់ធ្វើការវាយប្រហារគេនៅតែចង់ប្រើវិធីចាស់សម្រាប់ការដោះស្រាយបញ្ហាថ្មី។នេះមិនត្រឹមតែមិនបានមើលច្បាស់ពីនិន្នាការទូទៅនៃការអភិវឌ្ឍពិភពលោកនោះទេ ប៉ុន្តែជាការខ្វះនូវជំនឿចិត្តក្នុងការប្រឈមមុខនឹងស្ថានភាពផ្លាស់ប្តូរនៃសម័យកាលទៅវិញនោះទេ។ក្រោមការញុះញង់នៃអស់លោកទាំងឡាយដូចជាលោក John Bolton គោលនយោបាយការទូតរបស់អាមេរិកបាននាំមកនូវហានិភ័យកាន់តែច្រើនឡើងដល់សហរដ្ឋអាមេរិក៕