ក្នុងសន្និសីទអ្នកសារព័ត៌មានជាប្រចាំកាលពីថ្ងៃទី២១ខែកុម្ភៈ លោកកឹងស័ងអ្នកនាំពាក្យក្រសួងការបរទេសចិនបានថ្លែងថា ប្រទេសចិនកោតសរសើរកម្រិតខ្ពស់ចំពោះការវាយតម្លៃយ៉ាងសកម្មរបស់លោកភូទីនប្រធានាធិបតីរុស្ស៊ីចំពោះទំនាក់ទំនងរវាងចិននិងរុស្ស៊ី។
ពេលប្រកាសរបាយការណ៍អំពីសភាពការណ៍ជាតិនាពេលកន្លងទៅថ្មីៗនេះ លោកភូទីនប្រធានាធិបតីរុស្ស៊ីបានថ្លែងថា ប្រទេសរុស្ស៊ីយកចិត្តទុកដាក់ដល់ការពង្រីកទំនាក់ទំនងរវាងរុស្ស៊ីនិងចិន ទំនាក់ទំនងទ្វេភាគីដែលប្រកបដោយសមភាពនិងផ្តល់ផលប្រយោជន៍ដល់គ្នារវាងរុស្ស៊ីនិងចិនគឺជាកត្តាស្ថិរភាពដ៏សំខាន់មួយសម្រាប់កិច្ចការអន្តរជាតិ និងជាគំរូនៃកិច្ចសហប្រតិបត្តិការផ្នែកសេដ្ឋកិច្ចដ៏ល្អប្រសើរដែលមានអំណោយផលដល់ការធានាសន្តិសុខនៅក្នុងតំបន់អឺរ៉ុបនិងអាស៊ី។ ទាក់ទិននឹងរឿងនេះ លោកកឹងស័ងបានឆ្លើយសំណួររបស់អ្នកសារព័ត៌មានថា ប៉ុន្មានឆ្នាំចុងក្រោយនេះ នៅក្រោមការណែនាំយុទ្ធសាស្រ្តរបស់ប្រមុខរដ្ឋនៃប្រទេសទាំងពីរ ទំនាក់ទំនងភាពជាដៃគូសហការយុទ្ធសាស្រ្តគ្រប់ជ្រុងជ្រោយរវាងចិននិងរុស្ស៊ីទទួលបានការវិវឌ្ឍរីកចម្រើនយ៉ាងខ្លាំង មិនត្រឹមតែទទួលបានផ្លែផ្កាសហប្រតិបត្តិការយ៉ាងធំធេងលើវិស័យទ្វេភាគីប៉ុណ្ណោះទេ ថែមទាំងក៏បានបញ្ចូលកម្លាំងចលករយ៉ាងខ្លាំងទៅក្នុងការគាំពារស្ថិរភាពយុទ្ធសាស្រ្តលើពិភពលោកទាំងមូលទៀតផង៕
