ថ្ងៃទី ១៥ ខែកុម្ភៈ លោកវ៉ាង អ៊ី សមាជិកក្រុមប្រឹក្សាកិច្ចការរដ្ឋចិននិងជារដ្ឋមន្រ្តីក្រសួងការបរទេសចិនបានជួបពិភាក្សាជាមួយលោកVladmir Norov អគ្គលេខាធិការអាណត្តិថ្មីនៃអង្គការសហប្រតិបត្តិការសៀងហៃនៅក្រុងប៉េកាំង ។
ថ្លែងក្នុងកិច្ចជំនួប លោកវ៉ាង អ៊ី បានជូនពរលោក Norov ដែលបានរ៉ាប់រងមុខតំណែងជាអគ្គលេខាធិការនៃអង្គការសហប្រតិបត្តិការសៀងហៃ ព្រមនិងថ្លែងថា ប្រទេសចិនរីករាយរក្សាការប្រាស្រ័យទាក់ទងយ៉ាងជិតស្និទ្ធជាមួយលេខាធិការដ្ឋាននៃអង្គការសហប្រតិបត្តិការសៀងហៃ ផ្សព្វផ្សាយ”ស្មារតីសៀងហៃ” អនុវត្តឲ្យបានល្អនូវសមិទ្ធផលនៃសន្និសីទកំពូលក្រុងឈីងតាវ បន្តជំរុញកិច្ចសហប្រតិបត្តិការផ្នែកប្រឆាំងភេរវនិយម ចាប់ដំណើរការការសិក្សាស្រាវជ្រាវលទ្ធភាពកសាងតំបន់ពាណិជ្ជកម្មសេរី ធ្វើកិច្ចផ្លាស់ប្តូរផ្នែកវប្បធម៌មនុស្សជាតិឲ្យកាន់តែច្រើនថែមទៀត ជំរុញឲ្យស៊ីជម្រៅនូវការតភ្ជាប់រវាងកិច្ចកសាង”ខ្សែក្រវាត់មួយនិងផ្លូវមួយ”ជាមួយយុទ្ធសាស្រ្តអភិវឌ្ឍរបស់ប្រទេសនានា ក្នុងន័យជំរុញការអភិវឌ្ឍជាមួយគ្នាក្នុងតំបន់ ។
ជាការឆ្លើយតប លោកNorov បានថ្លែងថា នឹងបំពេញបេសកកម្មយ៉ាងសកម្ម អនុវត្តយ៉ាងស៊ីជម្រៅនូវមតិឯកភាពរួមរបស់ថ្នាក់ដឹកនាំនៃប្រទេសជាសមាជិកនិងសមិទ្ធផលនៃសន្និសីទកំពូលក្រុងឈីងតាវ រួមវិភាគទានក្នុងការជំរុញឲ្យអង្គការសហប្រតិបត្តិការសៀងហៃវិវឌ្ឍន៍រីកចម្រើនដោយឥតឈប់ឈរ ៕
