កាលពីថ្ងៃទី ១៥ ខែមករា លោកស្រីHua Chunying អ្នកនាំពាក្យក្រសួងការបរទេសចិនបានថ្លែងក្នុងសន្និសីទសារព័ត៌មានជាប្រចាំថា ការរីកចម្រើននៃវិទ្យាសាស្ត្រនិងបច្ចេកវិទ្យាគួរតែបម្រើដល់សន្តិភាពនិងវឌ្ឍនភាពរួមនៃមនុស្សជាតិ ភាគីចិនមានឆន្ទៈធ្វើការផ្លាស់ប្តូរនិងកិច្ចសហប្រតិបត្តិការខាងរុករកនៅលំហអវកាសខាងក្រៅជាមួយបណ្តាប្រទេសនានាលើពិភពលោក ក្នុងនោះរួមមានភាគីអាមេរិកផង ។
តាមដំណឹងឲ្យដឹងថា ទីភ្នាក់ងារអវកាសអាមេរិក（NASA）សង្ឃឹមថាភាគីចិនផ្តល់ទិន្នន័យនៃការចុះចតលើភពព្រះចន្ទរបស់យានរុករកព្រះចន្ទសញ្ញាឆាងអឺលេខ ៤ សម្រាប់ធ្វើការសិក្សាស្រាវជ្រាវវិទ្យាសាស្ត្រ ហើយភាគីចិនបានផ្តល់កិច្ចសហប្រតិបត្តិការ ។ នេះគឺជាកិច្ចសហប្រតិបត្តិការលើកដំបូងរវាងភាគីទាំងពីរបន្ទាប់ពីអាមេរិកហាមមិនឲ្យNASAធ្វើកិច្ចសហប្រតិបត្តិការផ្នែកអវកាសជាមួយប្រទេសចិនដោយគ្មានការអនុញ្ញាត្តិពីរដ្ឋសភាអាមេរិកនាឆ្នាំ ២០១១ មក ៕
