ចាប់ពីថ្ងៃទី ២៧ ខែវិច្ឆិកា ដល់ថ្ងៃទី ៥ ខែធ្នូ ឆ្នាំ២០១៨នេះ លោកស៊ីជីនភីងប្រធានរដ្ឋចិនបានអញ្ជើញទៅបំពេញទស្សនកិច្ចនៅប្រទេសអេស្ប៉ាញ អាហ្សង់ទីន ប៉ាណាម៉ានិងព័រទុយហ្គាល់ ព្រមទាំងការចូលរួមសន្និសីទកំពូលលើកទី ១៣ នៃមេដឹកនាំនៃក្រុមប្រទេស G ២០នៅក្រុងBuenos Aires ប្រទេសអាហ្សង់ទីន។ បន្ទាប់ពីបញ្ចប់ដំណើរទស្សនកិច្ច លោកវ៉ាងយី សមាជិកក្រុមប្រឹក្សាកិច្ចការរដ្ឋនិងជារដ្ឋមន្ត្រីការបរទេសចិនបានធ្វើការបកស្រាយទៅកាន់អ្នកកាសែតអំពីសភាពការណ៍នៃដំណើរទស្សនកិច្ចនេះ ។
លោកវ៉ាងយីបានថ្លែងថា ដំណើរទស្សនកិច្ចរបស់លោកប្រធានរដ្ឋចិន ស៊ីជីនភីង បានដឹកនាំប្រទេសចិនឲ្យមានទំនាក់ទំនងល្អជាមួយមហាប្រទេសសំខាន់ៗក្នុងរយៈពេលវែង ។ ដំណើរទស្សនកិច្ចរបស់លោកស៊ីជីនភីងនៅអឺរ៉ុបនិងអាមេរិកឡាទីនបានជំរុញនិន្នាការអភិវឌ្ឍកិច្ចសហប្រតិបត្តិការអំពីគំនិតផ្តួចផ្តើម “ ខ្សែក្រវាត់មួយនិងផ្លូវមួយ” ព្រមទាំងបានត្រួសត្រាយអនាគតនៃការអភិវឌ្ឍទំនាក់ទំនងរវាងចិននិងអឺរ៉ុប ចិននិងអាមេរិកឡាទីន ។
មតិជាតិអន្តរជាតិបានកោតសរសើរជាទូទៅចំពោះដំណើរទស្សនកិច្ចលើកនេះ ដោយបានបញ្ជាក់ថា ដំណើរការទូតរបស់ប្រមុខរដ្ឋចិនបានឆ្លុះបញ្ចាំងពីកម្លាំងឥទ្ធិពលរបស់ចិនលើឆាកអន្តរជាតិ ។ ពោលគឺទីមួយ បានបង្កើនកិច្ចសហប្រតិបត្តិការនៃក្រុមប្រទេសG20 ពង្រឹងនិងពង្រីកទំនាក់ទំនងជាមួយមហាប្រទេសនានា ។ ទីពីរ បង្កើនកិច្ចសហប្រតិបត្តិការរវាងចិននិងអេស្ប៉ាញ ចិននិងព័រទុយហ្គាល់ និងបំពេញបន្ថែមនូវកម្លាំងរស់រវើកដល់ទំនាក់ទំនងរវាងចិននិងអឺរ៉ុប ។ ទីបី រឹតចំណងមិត្តភាពរវាងចិននិងប្រទេសអាហ្សង់ទីន ចិននិងប៉ាណាម៉ា ធ្វើឲ្យមានភាពល្អពេញលេញនូវគម្រោងកិច្ចសហប្រតិបត្តិការរវាងចិននិងប្រទេសអាមេរិកឡាទីន ។ ទីបួន បានធ្វើការបកស្រាយពីផ្លូវនិងទស្សនៈនៃការអភិវឌ្ឍរបស់ចិន និងបង្ហាញពីទំនុកចិត្តនិងបរិយាប័នរបស់ចិន ។