ក្នុងសនិ្នសីទថ្នាក់ដឹកនាំលើកទីពីរដែលបានបើកធ្វើនៅប្រទេសសិង្ហបុរីក្នុងសបា្តហ៍នេះ ថ្នាក់ដឹកនាំនៃប្រទេសចំនួន ១៦ដែលជាសមាជិកនៃកិច្ចព្រមព្រៀងភាពជាដៃគូសេដ្ឋកិច្ចទូលំទូលាយក្នុងតំបន់(ហៅកាត់ RECP)បានឯកភាពគ្នាថា ការចរចាអំពី RECPទទួលបានការវិវឌ្ឍរីកចម្រើនជាក់ស្តែងរួចជាស្រេចហើយ ហើយកំពុងឈានចូលដំណាក់កាលចុងក្រោយបំផុតនៃការចរចា បណ្តាភាគីនានាបាននិងកំពុងខិតខំប្រឹងប្រែង ដើម្បីសម្រេចការចរចា RECP នេះនៅឆ្នាំ ២០១៩ ។ ប្រការនេះមានន័យថា ប្រទេសអាស៊ីប៉ាស៊ីហ្វិកត្រូវបានរំពឹងថា នឹងអាចឈានដល់កិច្ចព្រមព្រៀងពាណិជ្ជកម្មសេរីធំជាងគេនៅលើពិភពលោកនៅឆ្នាំក្រោយ ។
ទាក់ទឹននិងរឿងនេះ លោក លីខឺឈាង នាយករដ្ឋមន្ត្រីចិនបានលើកឡើងថា ការចរចាអំពី RECP ទទួលបានការវិវឌ្ឍរីកចម្រើនជាក់ស្តែង អត្រាសម្រេចបាននូវការចរចាបានលើកកម្ពស់ពីជិត៥០ភាគរយនាឆ្នាំទៅឡើងដល់ជិត ៨០ ភាគរយក្នុងឆ្នាំនេះ ។
បើយើងមើលដោយសត្យានុម័តអាចឃើញថា កម្រិតអភិវឌ្ឍសេដ្ឋកិច្ចនិងកម្រិតបើកទូលាយរបស់សមាជិកនៃ RECP គឺមិនទាន់មានតុល្យភាពទេ ដោយសារបណ្តាភាគីនានាស្ថិតក្នុងដំណាក់កាលអភិវឌ្ឍដ៏ខុសៗគ្នា ដូច្នេះ ថ្នាក់ដឹកនាំដែលបានចូលរួមសនិ្នសីទសង្ឃឹមថា RECP គួរតែបង្ហាញពីភាពរស់រវើក និងយោគយល់ពីចំណុចរសើបរៀងខ្លួន ក៏ដូចជាធានាឲ្យបាននូវភាពគ្រប់ជ្រុងជ្រោយ តុល្យភាព គុណភាពខ្ពស់ និងកម្រិតខ្ពស់របស់ RECP ដើម្បីធ្វើឲ្យប្រទេសក្នុងតំបន់ទាំងអស់សុទ្ធតែអាចទទួលបានផលប្រយោជន៍ ក៏ដូចជាសម្រេចបាននូវការផ្តល់ផលប្រយោជន៍ដល់គ្នាទៅវិញទៅមកនិងឈ្នះ-ឈ្នះ ។
បច្ចុប្បន្ន ក្រោមបរិបទដែលឯកតោភាគីនិយមនៅលើពិភពលោកកំពុងងើបឡើងវិញ ភាពផ្ទុយនឹងការធ្វើសកលភាវូបនីយកម្មនិងការគាំពារនិយមមានសភាពកាន់តែខ្លាំងឡើងៗ ការចរចាក្នុងដំណាក់កាលចុងក្រោយនៃRCEP គឺមានសារៈសំខាន់ខ្លាំងណាស់ ។
ទីមួយ RCEPនឹងផ្តល់ផលប្រយោជន៍ដល់ប្រជាជនក្នុងតំបន់ប្រមាណ ៣៥០០ លាននាក់ ដែលត្រូវជា ៥០ ភាគរយនៃចំនួនប្រជាជនសរុបលើទូទាំងពិភពលោក ។ បន្ទាប់ពីការឯកភាពគ្នា RCEPនឹងនាំមកនូវតំបន់ពាណិជ្ជកម្មសេរីមួយដែលមានទំហំធំជាងគេលើពិភពលោក ពោលគឺនឹងនាំមកនូវតម្លៃផលិតផលក្នុងស្រុកសរុបដែលមានតម្លៃ ២២,៥ ទ្រីលាននៅលើពិភពលោក ។
ទីពីរ RCEPបានបង្ហាញពីឆន្ទៈដ៏មុតមាំរបស់ប្រទេសកំពុងអភិវឌ្ឍន៍ ។
ទីបី RCEPនឹងបង្ហាញនូវការរួមចំណែករបស់ទី្វបអាស៊ីមួយដែលមានសាមគ្គីភាពចំពោះសេដ្ឋកិច្ចពិភពលោក ។
ដោយមកពីមានការព្រួយបារម្ភចំពោះការគាំពារនិយមខាងពាណិជ្ជកម្មរបស់អាមរិកនឹងកាន់តែរីករាលដាលខ្លាំងឡើងៗ អង្គភាពសេដ្ឋកិច្ចអាស៊ីនានាកាន់តែមានហេតុផលនិងកម្លាំងចលករក្នុងការជំរុញការចរចាចុងក្រោយនៃRCEP ។ នៅឆ្នាំ ២០១៩ ប្រហែលមិនត្រឹមតែអាចបញ្ចប់ការចរចាប៉ុណ្ណោះទេ ប៉ុន្តែអាចនឹងមានលទ្ធភាពចាប់ផ្តើមអនុវត្តក្នុងពេលតែមួយផងដែរ ៕