នាពេលថ្មីៗនេះ កាសែតBloombergរបស់អាំមេរិកបានចុះផ្សាយព័ត៌មានមួយថា ប្រទេសចិនបានដាក់បន្ទះមីក្រូឈីបម្យ៉ាងទៅក្នុងផលិតផលនៃសហគ្រាសប្រហែល៣០សហគ្រាសនៅអាមេរិក ដើម្បីស៊ើបយកការសម្ងាត់។យ៉ាងណាមិញ សហគ្រាសពាក់ព័ន្ធដែលមានឈ្មោះក្នុងការផ្សាយដំណឹងនេះ ដូចជាក្រុមហ៊ុនApple ក្រុមហ៊ុនAmazonជាដើមបានចេញសេចក្តីថ្លែងការណ៍ភ្លាមៗ ដើម្បីទាត់ចោលព័ត៌មានដែលថា ផលិតផលរបស់ខ្លួនត្រូវបានគេលួចដាក់បន្ទះមីក្រូឈីប និងចោទប្រកាន់យ៉ាងម៉ឺងម៉ាតថា ការផ្សាយដំណឹងពាក់ព័ន្ធគ្មានមូលដ្ឋានច្បាស់លាស់។
ការផ្សាយដំណឹងនៃកាសែតBloombergក៏បានអះអាងទៀតថា បន្ទះMainboardរបស់ក្រុមហ៊ុនSuperMicroអាមេរិកដែលផលិតក្នុងប្រទេសចិនត្រូវបានលួចដាក់បន្ទះឈីបHacker។ទាក់ទិននឹងរឿងនេះ ក្រុមហ៊ុនSuperMicroបានគូសបញ្ជាក់នៅក្នុងសេចក្តីថ្លែងការណ៍ថា ក្រុមហ៊ុនរបស់ខ្លួនមិនធ្លាប់រកឃើញបន្ទះឈីបHackerណាមួយ នោះទេ ហើយក៏មិនធ្លាប់ទទួលបានការតវ៉ាពីសំណាក់អតិថិជនណាមួយដែរ។ចំណែកឯក្រុមហ៊ុនApple ក្រុមហ៊ុនAmazonនិងក្រុមហ៊ុនSuperMicroក៏មិនធ្លាប់ទទួលការស៊ើបអង្កេតពីស្ថាប័នអនុវត្តច្បាប់របស់អាមេរិកដែរ។
ក្រសួងសន្តិសុខដែនដីជាតិអាមេរិកក៏ធ្លាប់បានអះអាងនៅខែតុលាដែរថា គ្មានមូលហេតុដែលត្រូវសង្ស័យទៅលើសេចក្តីថ្លែងការណ៍របស់សហគ្រាសពាក់ព័ន្ធរបស់អាមេរិកដែលឆ្លើយតបទៅនឹងការការផ្សាយដំណឹងរបស់កាសែតBloombergនោះទេ៕
