ដោយមិនអើពើនឹងមតិប្រឆាំងដ៏ច្រើនលើសលប់ទាំងក្នុងនិងក្រៅប្រទេស ប្រទេសអាមេរិកបានប្រកាសនៅថ្ងៃទី១៧ខែកញ្ញាថា នឹងដំឡើងពន្ធគយ១០ភាគរយចំពោះផលិតផលនាំចូលពីប្រទេសចិនក្នុងតម្លៃប្រមាណ២សែនលានដុល្លារអាមេរិកចាប់ពីថ្ងៃទី២៤ខែកញ្ញាឆ្នាំ២០១៨តទៅ ក្រៅពីនេះ នឹងចាត់វិធានការដំឡើងលំដាប់ថ្នាក់នៃពន្ធគយផ្សេងទៀត។អ្នកនាំពាក្យនៃក្រសួងពាណិជ្ជកម្មចិនបានថ្លែងកាលពីថ្ងៃទី១៨ខែកញ្ញា ដោយសម្តែងពីការសោកស្តាយខ្លាំងចំពោះទង្វើរបស់អាមេរិក។ដើម្បីគាំពារសិទ្ធិនិងផលប្រយោជន៍ស្របច្បាប់របស់ខ្លួននិងរបៀបរៀបរយពាណិជ្ជកម្មសេរីរបស់ពិភពលោកទាំងមូល ប្រទេសចិនត្រូវបង្ខិតចិត្តឲ្យចាត់វិធានការតបតវិញក្នុងពេលដំណាលគ្នាដោយខានពុំបាន។
អាមេរិកធ្វើការសម្រេចចិត្តដោយខ្វះវិចារណាណយ៉ាងនេះ បានបណ្តាលឲ្យសង្គ្រាមពាណិជ្ជកម្មរវាងចិននិងអាមេរិកកាន់តែឡើងកម្តៅថែមទៀត ។ ប៉ុន្តែប៉ុន្មានថ្ងៃមុន ប្រទេសអាមេរិកបានផ្ញើសារទៅកាន់ប្រទេសចិនដើម្បីស្នើឲ្យរៀបចំការពិគ្រោះពិភាក្សាជុំថ្មីស្តីពីសេដ្ឋកិច្ចនិងពាណិជ្ជកម្ម ប្រទេសចិនបានបង្ហាញពីការស្វាគមន៍របស់ខ្លួន ហើយទីផ្សារទូទាំងពិភពលោកក៏មានការកំណើនដោយសាររឿងនេះ ។ តែពេលនេះ អាមេរិកស្រាប់តែប្រកាសពីកាលបរិច្ឆេទនៃការអនុវត្តការដំឡើងពន្ធគយទៅលើផលិតផលចិនក្នុងតម្លៃ ២ សែនលានដុល្លារអាមេរិក ក្នុងគោលបំណងបន្តដាក់សម្ពាធកាន់តែខ្លាំងទៅលើប្រទេសចិនទៅវិញ ដើម្បីទទួលបានតម្លៃកាន់តែខ្ពស់ ។ ទាក់ទិននឹងរឿងនេះ ប្រទេសចិនបានគូសបញ្ជាក់ថា ការដែលអាមេរិកទទូចដំឡើងពន្ធគយ ធ្វើឲ្យការពិគ្រោះពិភាក្សាទ្វេភាគីមានភាពមិនប្រាកដប្រជាថ្មី សង្ឃឹមថាអាមេរិកអាចយល់ដឹងពីផលវិបាកនៃទង្វើរបស់ខ្លួន ព្រមនិងចាត់វិធានការដែលអាចទុកចិត្តបាន ក៏ដូចជាកែតម្រូវកំហុសរបស់ខ្លួនឲ្យបានទាន់ពេលវេលា ៕