រសៀលថ្ងៃទី ១៩ ខែសីហា តាមម៉ោងប្រទេសឥណ្ឌូណេស៊ី លោកស្រី Sun Chunlan បេសកជនពិសេសរបស់លោក ស៊ីជីនភីង ប្រធានរដ្ឋចិន និងជាឧបនាយករដ្ឋមន្ត្រីចិនបានជួបពិភាក្សាការងារជាមួយលោកស្រី Puan Maharani រដ្ឋមន្ត្រីក្រសួងអភិវឌ្ឍន៍មនុស្សជាតិនិងរៀបចំផែនការវប្បធម៌នៃប្រទេសឥណ្ឌូណេស៊ី ។
ក្នុងកិច្ចជំនួប លោកស្រី Sun Chunlan បានលើកឡើងថា ការផ្លាស់ប្តូរវប្បធម៌មនុស្សជាតិគឺជាស្ពាននិងខ្សែចំណងក្នុងការរឹតបន្តឹងមនោសញ្ចេតនាមេត្រីភាពនិងទំនុកចិត្តចំពោះគ្នារវាងប្រជាជននៃប្រទេសទាំងពីរ ។ តាំងពីយន្តការផ្លាស់ប្តូរវប្បធម៌មនុស្សជាតិថ្នាក់ឧបនាយករដ្ឋមន្ត្រីរវាងចិននិងឥណ្ឌូណេស៊ីបានបង្កើតមក គឺបានដើរតួនាទីយ៉ាងសកម្ម ប្រទេសចិនរីករាយរួមសហការជាមួយឥណ្ឌូណេស៊ីដើម្បីធ្វើកិច្ចសហប្រតិបតិ្តការនិងការផ្លាស់ប្តូរលើវិស័យវប្បធម៌មនុស្សជាតិឲ្យកាន់តែស៊ីជម្រៅថែមទៀត ដើម្បីបំពេញបន្ថែមកម្លាំងជំរុញសម្រាប់ការអភិវឌ្ឍទំនាក់ទំនងភាពជាដៃគូយុទ្ធសាស្ត្រគ្រប់ជ្រុងជ្រោយរវាងប្រទេសទាំងពីរ ។ លោកស្រីបានលើកឡើងសំណើ៦ចំណុច មានជាអាទិ៍៖ទីមួយ បង្កើនកិច្ចសហប្រតិបតិ្តការលើវិស័យអប់រំ ។ ទីពីរ ធ្វើឲ្យស៊ីជម្រៅនូវការផ្លាស់ប្តូរវប្បធម៌មនុស្សជាតិ ។ ទីបី ជំរុញកិច្ចសហប្រតិបតិ្តការលើវិស័យកីឡា ។ ទីបួន ត្រួសត្រាយកិច្ចសហប្រតិបតិ្តការលើវិស័យទេសចរណ៍ ។ ទីប្រាំ ធ្វើឲ្យការផ្លាស់ប្តូររវាងយុវជនមានភាពស្អិតល្មួត ។ ទីប្រាំមួយ បង្កើនកិច្ចសហប្រតិបតិ្តការផ្នែកសុខាភិបាល ដើម្បីជំរុញកិច្ចសហប្រតិបតិ្តការលើវិស័យសុខាភិបាលសាធារណៈ សុខភាពគ្រប់ជ្រុងជ្រោយ ការបណ្តុះបណ្តាលធនធានមនុស្ស ការអប់រំខាងសុខាភិបាលជាដើម ។
ជាការឆ្លើយតប លោកស្រី Puan Maharani បានថ្លែងថា ប្រទេសឥណ្ឌូណេស៊ីយកចិត្តទុកដាក់ខ្ពស់ចំពោះសំណើ៦ចំណុចរបស់លោកស្រី Sun Chunlan ឧបនាយករដ្ឋមន្ត្រីចិនស្តីពីការបង្កើនការផ្លាស់ប្តូរវប្បធម៌មនុស្សជាតិរវាងប្រទេសទាំងពីរ រំពឹងថានឹងអាចបន្តរួមសហការជាមួយប្រទេសចិនដើម្បីរៀបចំសនិ្នសីទយន្តការឲ្យបានល្អ ធ្វើឲ្យស៊ីជម្រៅថែមទៀតនូវការផ្លាស់ប្តូរនិងកិច្ចសហប្រតិបតិ្តការលើវិស័យអប់រំ បច្ចេកវិទ្យា វប្បធម៌ សុខាភិបាល និងកីឡាជាដើម ក្នុងន័យជំរុញការអភិវឌ្ឍទំនាក់ទំនងរវាងប្រទេសទាំងពីរ ដើម្បីផ្តល់ផលប្រយោជន៍ជាក់ស្តែងជូនដល់ប្រជាជននៃប្រទេសទាំងពីរ ៕
