យប់ថ្ងៃទី១៩ខែសីហា លោកImran Khanនាយករដ្ឋមន្រ្តីប៉ាគីស្ថានដែលទើបឡើងកាន់មុខតំណែងបានថ្លែងសុន្ទរកថាតាមទូរទស្សន៍ ដោយបានអធិប្បាយអំពីគំនិតនិងចំណុចសំខាន់ក្នុងការងារអភិបាលកិច្ចជាតិស្តីពីបញ្ហាសេដ្ឋកិច្ច ជីវភាពរស់នៅរបស់ប្រជាជន ការប្រឆាំងអំពើពុករលួយនិងការគ្រប់គ្រងប្រព័ន្ធកំណែទម្រង់ជាដើម។
លោកImran Khanបានថ្លែងថា បច្ចុប្បន្ន ការអភិវឌ្ឍសេដ្ឋកិច្ចរបស់ប៉ាគីស្ថានបានប្រឈមនឹងការលំបាកដែលមិនធ្លាប់មាន ពីមុន បំណុលបានឡើងដល់កម្រិតខ្ពស់បំផុតក្នុងប្រវត្តិសាស្រ្ត រដ្ឋាភិបាលថ្មីនឹងជំរុញការអភិវឌ្ឍសេដ្ឋកិច្ចតាមរយៈកំណែទម្រង់ពន្ធដារ គាំទ្រសហគ្រាសឲ្យពង្រីកការនាំចេញ ជំរុញការអភិវឌ្ឍសហគ្រាសធុនតូចនិងមធ្យម និងកៀរគរប្រាក់ទុនបរទេសយ៉ាងសកម្មជាដើម។
សូមរំលឹកថា លោកImran Khanត្រូវបានជ្រើសតាំងជានាយករដ្ឋមន្រ្តីអាណត្តិថ្មីក្នុងការបោះឆ្នោតរដ្ឋសភាប៉ាគីស្ថានកាលពីថ្ងៃទី១៧ខែសីហា ព្រមទាំងបានធ្វើសច្ចាប្រណិធានឡើងកាន់មុខតំណែងនៅថ្ងៃទី១៨ខែសីហា៕
