ថ្ងៃទី ២២ ខែកក្កដា លោក ស៊ីជីនភីង ប្រធានរដ្ឋចិនបានធ្វើដំណើរទៅដល់ក្រុងគីហ្កាលី ចាប់ផ្តើមបំពេញទស្សនកិច្ចផ្លូវរដ្ឋនៅសាធារណរដ្ឋរវ៉ាន់ដា ។
លោក ស៊ីជីនភីង បានលើកឡើងថា ដំណើរទស្សនកិច្ចរបស់លោកលើកនេះ គឺជាទស្សនកិច្ច លើកដំបូងនៅរ្វាន់ដារបស់ប្រធានរដ្ឋចិន ។ ពិតមែនតែប្រទេសចិននិងរវ៉ាន់ដាមានគម្លាតពីគ្នាយ៉ាងឆ្ងាយក្តី ប៉ុន្តែទំនាក់ទំនងរវាងប្រទេសទាំងពីរមានចំណងមេត្រីភាពជាប្រពៃណី ប្រជាជនរវាងប្រទេសទាំងពីរមានចំណងមិត្តភាពយ៉ាងជ្រាលជ្រៅ ។ តាំងពីបានបង្កើតទំនាក់ទំនងការទូតរយៈពេល ៤៧ ឆ្នាំមក ភាគីទាំងពីរប្រកាន់ខ្ជាប់ការគោរពរាប់អានគ្នាប្រកបដោយភាពស្មោះត្រង់ មេត្រីភាពនិងសមភាព ទំនាក់ទំនងរវាងចិននិងរវ៉ាន់ដាទទួលបានការអភិវឌ្ឍដោយរឹងមាំនិងមានស្ថិរភាព ។ ក្នុងអំឡុងពេលលោក Kagame ប្រធានាធិបតីរវ៉ាន់ដាទៅបំពេញទស្សនកិច្ចនៅប្រទេសចិនកាលពីខែមីនា ឆ្នាំទៅ ប្រទេសចិននិងរវ៉ាន់ដាបានធ្វើការផ្លាស់ប្តូរយ៉ាងស៊ីជម្រៅអំពីទំនាក់ទំនងទ្វេភាគីនិងកិច្ចសហប្រតិបតិ្តការផ្តល់ផលប្រយោជន៍ដល់គ្នាទៅវិញទៅមក ហើយគំនិតឯកភាពដែលបានសម្រេចនៅកាលនោះបាននិងកំពុងទទួលបានការអនុវត្តដោយគ្រប់ជ្រុងជ្រោយនិងប្រកបដោយប្រសិទ្ធភាព ។ ក្នុងរយៈពេលជាងមួយឆ្នាំមកនេះ ថ្នាក់ដឹកនាំនៃប្រទេសទាំងពីរបានសម្រេចការបំពេញទស្សនកិច្ចគ្នាទៅវិញទៅមកដោយជោគជ័យ ប្រការនេះបានបង្ហាញយ៉ាងពេញលេញនូវការយកចិត្តទុកដាក់ខ្ពស់របស់ភាគីទាំងពីរចំពោះការអភិវឌ្ឍទំនាក់ទំនងរវាងចិននិងរវ៉ាន់ដា ។
សូមបញ្ជាក់ថា ក្នុងដំណើរទស្សនកិច្ចរបស់លោកប្រធានរដ្ឋចិនស៊ីជីនភីង លើកនេះលោក Kagame ប្រធានាធិបតីរវ៉ាន់ដាបានតាងនាមឲ្យរដ្ឋាភិបាលនិងប្រជាជនរវ៉ាន់ដាសំដែងការស្វាគមន៍យ៉ាងរាក់ទាក់កកក្តៅចំពោះលោកប្រធានរដ្ឋចិន ស៊ីជីនភីង ព្រមទាំងបានជូនពរទុកជាមុនឲ្យទស្សនកិច្ចលើកនេះទទួលបានជោគជ័យដោយគាប់ប្រសើរ ៕
