មហាសន្និបាតការពារអេកូ-បរិស្ថានទូទាំងប្រទេសចិនបានបើកធ្វើពីថ្ងៃទី១៨ដល់ថ្ងៃទី១៩ខែឧសភានៅក្រុងប៉េកាំង ។ លោក ស៊ីជីនភីង អគ្គលេខាធិការមជ្ឈិមបក្សកុម្មុយនិស្តចិន ប្រធានរដ្ឋចិន និងជាប្រធានគណៈកម្មាធិការយោធាមជ្ឈិមចិនបានអញ្ជើញចូលរួមសន្និសីទនិងថ្លែងសុន្ទរកថា ។ លោកបានគូសបញ្ជាក់ថា ត្រូវតែប្រើប្រាស់យ៉ាងពេញលេញនូវមូលដ្ឋានសម្ភារៈដ៏រឹងមាំដែលសន្សំក្នុងរយៈពេល៤០ឆ្នាំកន្លងទៅនេះនៃកំណែទម្រង់និងបើកទូលាយ បង្កើនកម្លាំងជំរុញការកសាងអរិយធម៌អេកូបរិស្ថាន ដោះស្រាយបញ្ហាអេកូបរិស្ថាន ធ្វើសង្គ្រាមបង្ការនិងគ្រប់គ្រងការបំពុលឲ្យបានល្អជាដាច់ខាត ដើម្បីជំរុញការកសាងអរិយធម៌អេកូបរិស្ថានប្រទេសចិនឲ្យបោះជំហានថ្មីទៀត ។
អំពីទស្សនៈស្តីពីការកសាងអរិយធម៌អេកូបរិស្ថានដែលបង្ហាញក្នុងសុន្ទរកថារបស់លោកស៊ីជីនភីង អគ្គលេខាធិការ ត្រូវបានលោក John B.Cob Jr. បណ្ឌិតនៃបណ្ឌិតសភាវិទ្យាសាស្ត្រមនុស្សសាស្ត្រជាតិសហរដ្ឋអាមេរិកដែលមានអាយុ៩៣បានយល់ស្របហើយថា “ការស្វែងរកការអភិវឌ្ឍ គឺត្រូវការគិតពិចារណាដល់ពេលអនាគតនិងសុភមង្គលរបស់ប្រជាជនទាំងអស់ជាយូរអង្វែង តែមិនមែនផលប្រយោជន៍បណ្តោះអាសន្ននោះទេ ហើយនេះក៏ជាទស្សនៈអភិវឌ្ឍន៍អរិយធម៌អេកូបរិស្ថានរបស់លោក ស៊ីជីនភីង និងជាមូលហេតុសំខាន់ដែលខ្ញុំមានគោលបំណងយ៉ាងខ្លាំងចំពោះការអភិវឌ្ឍអរិយធម៌អេកូបរិស្ថានរបស់ប្រទេសចិនដែរ” ។
លោក erik solheim អគ្គលេខាធិការរងនិងជាប្រធានប្រតិបត្តិនៃកម្មវិធីបរិស្ថាននៃអង្គការសហប្រជាជាតិបានថ្លែងថា ក្នុងរយៈពេល៥ឆ្នាំកន្លងទៅនេះ អេកូបរិស្ថានរបស់ចិនបានប្រែប្រួលឆ្ពោះទៅកាន់ទិសដៅវិជ្ជមាន ។ ប្រទេសចិនមានការស្វែងយល់ល្អប្រសើរក្នុងវិស័យគ្រប់គ្រងបរិស្ថាន ដែលគួរឲ្យប្រទេសកំពុងអភិវឌ្ឍន៍ផ្សេងទៀតរៀនសូត្រតាម ។