កាលពីថ្ងៃទី២០ ខែឧសភា តាមម៉ោងនៅក្នុងតំបន់ ខណៈពេលលោកវ៉ាងយី សមាជិកក្រុមប្រឹក្សាកិច្ចការរដ្ឋចិននិងជារដ្ឋមន្ត្រីក្រសួងការបរទេសចិនអញ្ជើញចូលរួមសន្និសីទរដ្ឋមន្រ្តីក្រសួងការបរទេសនៃក្រុមប្រទេសG20នៅក្រុងប៊ុយណូស៊ៃបានជួបសន្ទនាការងារជាមួយលោក Stef Blok រដ្ឋមន្រ្តីក្រសួងការបរទេសហូឡង់។
ថែ្លងក្នុងកិច្ចជំនួប លោកវ៉ាងយីបានលើកឡើងថា ប្រទេសចិនមានឆន្ទៈរួមជាមួយប្រទេសហូឡង់អនុវត្តឲ្យបានល្អនូវគំនិតឯកភាពរួមរវាងមេដឹកនាំនៃប្រទេសទាំងពីរ ហើយរក្សាការអភិវឌ្ឍទំនាក់ទំនងរវាងចិននិងហូឡង់ប្រកបដោយភាពរឹងមាំនិងស្ថិរភាពថែមទៀត។ប្រទេសចិនរំពឹងថា ប្រទេសហូឡង់នឹងបន្តផ្តល់បរិយាកាសយុត្តិធម៌ មេត្រីភាពនិងបើកទូលាយចំពោះកិច្ចសហប្រតិបត្តិការផែ្នកពាណិជ្ជកម្មនិងវិនិយោគរវាងប្រទេសទាំងពីរព្រមទាំងបង្កើនកិច្ចសហប្រតិបត្តិការលើគ្រប់វិស័យក្រោមក្របខ័ណ្ឌគំនិតផ្តួចផ្តើមខ្សែក្រវាត់មួយនិងផ្លូវមួយ។
ជាការឆ្លើយតប លោក Stef Blok បានថែ្លងថា សហគមន៍អន្តរជាតិប្រឈមនឹងបញ្ហាប្រកួតប្រជែងរួមគ្នាជាច្រើននាពេលបច្ចុប្បន្ននេះ ប្រទេសហូឡង់រំពឹងថា នឹងបង្កើនការទាក់ទងគ្នានិងការសម្របសម្រួលជាមួយប្រទេសចិនស្តីពីបញ្ហាអន្តរជាតិនិងតំបន់សំខាន់ៗ។គំនិតផ្តួចផ្តើមខ្សែក្រវាត់មួយនិងផ្លូវមួយនឹងអំណោយផលដល់ពាណិជ្ជកម្មអន្ដរជាតិប្រទេសហូឡង់ប្រកាន់អាកប្បកិរិយាបើកចំហចំពោះការនេះ ហើយមានឆន្ទៈបង្កើនកិច្ចសហប្រតិបត្តិការជាមួយប្រទេសចិនក្នុងការកសាងរួមគ្នានូវគំនិតផ្តួចផ្តើមខ្សែក្រវាត់មួយនិងផ្លូវមួយក្នុងក្របខ័ណ្ឌសហភាពអឺរ៉ុបថែមទៀត៕